काठमाडौं ।  नेपाली कांग्रेस ले आफ्ना सांसद गीता सेन्दाङ लाई प्रतिनिधिसभा बैठकबाट बाहिर निकालिएको विषयमा आपत्ति जनाएको छ ।

मंगलबारको बैठकमा बोल्दै कांग्रेसका सचेतक निष्कल राई ले सभामुखले पूर्वसूचना वा सचेतसमेत नगराई सांसदलाई बाहिर निकालिएको भन्दै विरोध जनाए ।

उनले प्रतिनिधिसभा नियमावलीको नियम ३० अनुसार कुनै सदस्यलाई बाहिर निकाल्नुअघि सभामुखले सचेत गराउनुपर्ने व्यवस्था रहेको उल्लेख गरे ।

‘नियमावलीअनुसार पहिला सभामुखले सचेत गराउनुपर्ने हो । तर त्यसो नगरी मर्यादापालकमार्फत हाम्रो सांसदलाई बाहिर निकालियो । यसप्रति हाम्रो गम्भीर आपत्ति छ,’ राईले भने ।

यता सभामुख डीपी अर्याल ले भने आफ्नै निर्देशनमा मर्यादापालकले गीता सेन्दाङलाई बैठकबाट बाहिर निकालेको स्पष्ट पारे ।