काठमाडौं। नेपाल एसियन गेम्स पुरुष क्रिकेट प्रतियोगितामा समूह विजेता बन्दै छनोट भएको छ।

समूह ‘ए’ अन्तर्गत सिङ्गापुरको राष्ट्रिय क्रिकेट स्टेडियममा बिहीबार भएको खेलमा नेपालले मलेसियालाई १६७ रनले पराजित गर्दै लगातार दोस्रो जित दर्ता गरेको हो।

जितका लागि २७६ रनको लक्ष्य पछ्याएको मलेसिया २० ओभरमा ९ विकेट गुमाउँदै १०८ रनमै सीमित भयो। मलेसियाका कप्तान सयद अजिजले सर्वाधिक ५४ रनको अर्धशतकीय इनिङ्स खेले पनि टोलीलाई हारबाट जोगाउन सकेनन्। उनले ४५ बलमा ६ चौका र २ छक्का प्रहार गरे। शर्विन मुनियान्डीले १८ रन र ओपनर मोहम्मद हाजिकले १३ रन जोडे। अन्य ब्याट्सम्यान भने दोहोरो अंकमा पुग्न सकेनन्।

नेपालका बलरहरूले सन्तुलित प्रदर्शन गरे। शेर मल्लले ३ विकेट लिए भने सन्दीप लामिछाने, सोमपाल कामी, करण केसी, दीपेन्द्रसिंह ऐरी र कुशल मल्लले समान १–१ विकेट लिए।

त्यसअघि टस हारेर पहिले ब्याटिङ गरेको नेपालले २० ओभरमा ७ विकेट गुमाउँदै २७५ रनको विशाल योगफल खडा गरेको थियो। नेपालका लागि कुशल भुर्तेलले विस्फोटक शतक प्रहार गर्दै १२६ रन बनाए। उनले ५४ बलमा १४ चौका र ८ छक्का प्रहार गरे। यो उनको लगातार दोस्रो शतक हो। यसअघि चीनविरुद्धको पहिलो खेलमा पनि उनले शतक बनाएका थिए। टी–२० अन्तर्राष्ट्रियमा यो उनको तेस्रो शतक समेत हो।

आसिफ शेखले पनि उत्कृष्ट प्रदर्शन गर्दै ६८ रन जोडे। उनले २४ बलमा ५ चौका र ७ छक्का प्रहार गरे। कप्तान दीपेन्द्रसिंह ऐरीले ३१ रन, सन्दीप जोराले १५ रन, लोकेश बमले १० रन र कुशल मल्लले अविजित ९ रन बनाए।

मलेसियाका लागि बलिङमा भिरनदीप सिंहले ३ विकेट लिए भने विजय उनई र कप्तान सयद अजिजले २–२ विकेट लिए।

यसअघि पहिलो खेलमा नेपालले चीनलाई २२१ रनले पराजित गरेको थियो। लगातार दुई जितसँगै नेपालले समूह विजेता बन्दै एसियन गेम्समा स्थान सुरक्षित गरेको हो। समूह ‘ए’ बाट मलेसिया पनि छनोट भएको छ भने लगातार दोस्रो हारपछि चीन प्रतियोगिताबाट बाहिरिएको छ।

समूह ‘बी’ मा ओमान, हङकङ, बहराइन र सिङ्गापुर रहेका छन्।

प्रतियोगिताको नियमअनुसार समूहका शीर्ष दुई टोली एसियन गेम्सका लागि छनोट हुने व्यवस्था रहेको छ।