काठमाडौं। राष्ट्रिय प्रजातन्त्र पार्टी (राप्रपा) परित्याग गरेका नेता धवल शम्शेर राणाले नयाँ राजनीतिक दल गठन गर्ने घोषणा गरेका छन्।

काठमाडौंमा आयोजित एक भेलालाई सम्बोधन गर्दै उनले वर्तमान अवस्थामा राप्रपाबाट आफूहरूले बोकेको राजनीतिक विचार र उद्देश्य पूरा गर्न नसकिने निष्कर्षमा पुगेपछि नयाँ यात्राको निर्णय गर्नुपरेको बताएका हुन्।

राणाले पाँच वर्षअघि राजेन्द्र लिङ्देनलाई पार्टी अध्यक्ष बनाउन आफूहरूले सक्रिय भूमिका खेलेको स्मरण गर्दै अहिले भने त्यही पार्टी छाड्नुपरेको अवस्था दुःखद भएको बताए।

उनले भने, ‘पाँच वर्षअघि हामीले राजेन्द्र लिङ्देनलाई अंगालो मारेर अध्यक्ष बनाएका थियौँ। तर आज त्यही घर छाड्नुपर्ने अवस्था आएको छ। यो खुसीको होइन, दुःखको दिन हो। तर जब आफूले विश्वास गरेको मूल्य र मान्यतालाई त्यही घरभित्रबाट स्थापित गर्न नसकिने अवस्था आउँछ, तब हिम्मत गरेर अर्को घर बनाउनैपर्छ।’

धवल शम्शेरले राप्रपा अहिले वैचारिक र संगठनात्मक रूपमा कमजोर बन्दै गएको आरोप पनि लगाए। उनका अनुसार पार्टीभित्र सुधारको प्रयास गरिए पनि त्यसलाई अगाडि बढ्न नदिइएको र आफूहरूले उठाएका एजेन्डाले उचित स्थान नपाएको गुनासो छ।

‘मक्किसकेको र चर्किसकेको घरमा बसिरहनुभन्दा नयाँ घर निर्माण गर्नु नै उचित ठानेका छौँ,’ उनले भने, ‘पछिल्ला चार वर्ष मेरो राजनीतिक जीवनकै सबैभन्दा पीडादायी समय बने। मैले पार्टीलाई सही दिशा दिन, आन्दोलनलाई बलियो बनाउन र राप्रपालाई देशकै प्रमुख राजनीतिक शक्तिका रूपमा स्थापित गर्न प्रयास गरेँ, तर मेरा ती प्रयासहरूलाई अघि बढ्न दिइएन।’

उनले नयाँ दल गठनको तयारी सुरु भइसकेको संकेत दिँदै आफूहरूसँग समान सोच र उद्देश्य भएका व्यक्तिहरूलाई एकत्रित गर्ने काम अगाडि बढाइएको बताए। यद्यपि नयाँ पार्टीको नाम, संरचना र आगामी कार्ययोजनाबारे भने विस्तृत जानकारी सार्वजनिक गरिएको छैन।

यसैबीच, धवल शम्शेर राणासहित १८६ जनाले सामूहिक रूपमा राप्रपा परित्याग गरेको घोषणा गरेका छन्।