बर्दिया। गृहमन्त्रालयमा सुधन गुरुङले पद भार सम्हालेपछि बर्दियामा नक्कली सिँचाइ कार्यालय खोलेर सर्वसाधारणलाई ठगी गर्ने दम्पतिलाई प्रहरीले पक्राउ गरेको छ।

ठाकुरबाबा नगरपालिका-०३ बगनाहा बजारमा ‘प्रगन्ना तथा बड्कापथ सिँचाइ विभाग’ नामक झुटो कार्यालय स्थापना गरी उनीहरूले कर्मचारी नियुक्त गर्ने र मजदुरीमा काम लगाइदिने प्रलोभन देखाएर ठगी गर्दै आएको आरोप छ।

प्रहरीका अनुसार उनीहरूले कामदारलाई ज्याला नदिने, घरधनीलाई भाडा नतिर्ने तथा सरकारी कागजात र छाप नक्कली रूपमा प्रयोग गर्ने गरेका थिए।

पक्राउ पर्नेमा ठाकुरबाबा नगरपालिका–०३ का २४ वर्षीय घनश्याम न्यौपाने र उनकी श्रीमती दाङको लमही नगरपालिका–०५ की २३ वर्षीया कृपा चौधरी रहेका छन्।

दुवै जनामाथि लिखतसम्बन्धी कसुर तथा ठगी मुद्दामा थप अनुसन्धान भइरहेको प्रहरीले जनाएको छ।