काठमाडौं । फिफा विश्वकप फुटबलमा एसियाली पावरहाउस जापानले बलियो युरोपियन टोली नेदरल्यान्ड्ससँग २-२ गोलको रोमाञ्चक बराबरी खेलेको छ। अमेरिकाको डलासमा सम्पन्न समूह चरणको खेलमा जापानले अन्तिम समयमा गोल गर्दै महत्वपूर्ण एक अंक सुरक्षित गरेको हो।

प्रतिस्पर्धात्मक मानिएको यस खेलको पहिलो हाफ गोलरहित बराबरीमा सकिए पनि दोस्रो हाफमा दुवै टोलीले आक्रामक खेल प्रस्तुत गर्दा चार गोल सम्भव बने। रोनाल्ड कोएमानको प्रशिक्षणमा रहेको नेदरल्यान्ड्सले दुई पटक अग्रता बनाए पनि जापानले दुवै अवसरमा उत्कृष्ट पुनरागमन गर्दै हार टारेको थियो।

दोस्रो हाफ सुरु भएको छैटौं मिनेटमै नेदरल्यान्ड्सले अग्रता लियो। रायन ग्राभेनबर्खको आकर्षक क्रसमा कप्तान भर्जिल भान डाइकले सटीक हेडमार्फत गोल गर्दै टोलीलाई १-० ले अघि बढाए।

तर जापानले केही मिनेटमै खेल बराबरीमा ल्यायो। ५७औँ मिनेटमा केइतो नाकामुराको शक्तिशाली प्रहारलाई डच गोलरक्षक बार्ट फेर्ब्रुगेनले नियन्त्रण गर्न नसक्दा बल जालीमा पुग्यो र खेल १-१ को अवस्थामा आयो।

नेदरल्यान्ड्सले पुनः ६४औँ मिनेटमा अग्रता बनायो। वेस्ट ह्याम युनाइटेडका फरवार्ड क्रिसेन्सियो समरभिलले पेनाल्टी क्षेत्रभित्रबाट गरेको उत्कृष्ट प्रहार जापानी गोलरक्षक जियोन सुजुकीको पहुँच बाहिर रहँदा डच टोली २-१ ले अघि बढ्यो।

तर त्यसपछि जापानले लगातार दबाब सिर्जना गरिरह्यो। खेल सकिन दुई मिनेट बाँकी रहँदा कोकी ओगावाको प्रहारलाई दाइची कामादाले चलाखीपूर्ण हेडमार्फत जाली चुमाउँदै खेल २-२ को बराबरीमा पुर्‍याए।

कामादाको उक्त निर्णायक गोलसँगै जापानले दुई पटक पछि परेको अवस्थाबाट शानदार पुनरागमन गर्दै बलियो डच टोलीविरुद्ध महत्वपूर्ण एक अंक बटुल्न सफल भयो। प्रतियोगिताको सुरुवाती खेलमै देखाएको संघर्षपूर्ण प्रदर्शनले जापानलाई आगामी खेलहरूका लागि थप आत्मविश्वास प्रदान गरेको छ।