गण्डकी। गण्डकी प्रदेशसभाको आजको बैठकमा आगामी आर्थिक वर्ष २०८३/०८४ को विनियोजन विधेयकअन्तर्गत मन्त्रालयत शीर्षकमाथिको छलफल सुरु भएको छ ।

आर्थिक मामिलामन्त्री जितबहादुर शेरचनले गत शुक्रबार प्रदेशसभामा प्रस्तुत गर्नुभएको आगामी आवको सेवा र कार्यको लागि प्रदेश सञ्चित कोषबाट रकम विनियोजन र खर्च गर्ने सम्बन्धमा व्यवस्था गर्न बनेको विधेयकमाथिको सामान्य छलफल सोमबार सकिएपछि मन्त्रालयगत विनियोजन शीर्षकमा छलफल सुरु भएको हो ।

उद्योग तथा पर्यटन मन्त्रालय, कृषि, भूमि व्यवस्था तथा सहकारी मन्त्रालय र उर्जा, जलस्रोत तथा खानेपानी मन्त्रालयसँग सम्बन्धित विनियोजन शीर्षकमा छलफल सुरु भएको प्रदेशसभाका सभामुख कृष्णप्रसाद धितालले बताए ।

आजको छलफलमा प्रदेशसभा सदस्य महेश भट्टराई, देवका पहाडी त्रिपाठी, कुसुम पुन बुढा, बिन्दु पौडेल, श्यामराजा महतलगायतले आफ्ना धारणा राखेका थिउ ।

छलफलमा भाग लिनुहुने प्रदेशसभा सदस्यहरूले बजेटको प्रभावकारी कार्यान्वयनमा जोड दिएका थिए । दुरगामी प्रभाव पार्ने र नागरिकको जीवनस्तरमा सुधार ल्याउने कार्यक्रम तथा योजनालाई प्राथमिकतामा दिनुपर्ने उनीहरूको भनाइ थियो ।

गण्डकी प्रदेश सरकारले यही असार १ गते रु ३२ अर्ब ९९ करोड ९९ लाखको बजेट सार्वजनिक गरेको थियो । विनियोजन विधेयकमाथि प्रदेशसभामा छलफल जारी छ । प्रदेशसभाको अर्को बैठक बुधबार बिहान ११ बजे बस्ने प्रदेशसभा सचिवालयले जनाएको छ ।