फ्रान्स र नर्वेबीच शुक्रबार विश्वकपको महत्वपूर्ण समूह ‘आई’ को निर्णायक खेलमा लयमा रहेका गोलकर्ता किलियन एमबाप्पे र एर्लिङ हालान्डबीच रोमाञ्चक भिडन्त हुने भएको छ ।

रियल मड्रिडका स्टार एमबाप्पे र म्यानचेस्टर सिटीका स्ट्राइकर हल्यान्डले प्रतिस्पर्धाको सुरुवातदेखि नै उत्कृष्ट प्रदर्शन गरेका छन् । अर्जेन्टिनाका लियोनल मेसी पाँच गोलसहित गोल्डेन बुटको दौडमा पहिलो स्थानमा रहेपनि एमबाप्पे र हल्यान्ड दुवैले ४–४ गोल गरेका छन् र गोल्डेन बुटको दौडमा दोस्रो स्थानमा छन् ।

स्थानीय समय अनुसार शुक्रबार दिउँसो ३ः०० बजे बोस्टनको फक्सबरोमा हुने यो भिडन्तमा समूहको शीर्ष स्थानका लागि प्रतिस्पर्धा हुनेछ ।

सेनेगल र इराकलाई सहजै हराएको फ्रान्सको प्रदर्शन प्रभावशाली छ । उनीहरूको राम्रो गोल अन्तरका कारण फ्रान्सलाई समूहको पहिलो स्थानमा रहनका लागि बराबरी मात्र काफी छ ।

त्यसैगरी नर्वेको पनि अहिलेसम्मको खेलमा निकै राम्रो प्रदर्शन भइरहेको छ । नर्वेले आफ्नो पहिलो खेलमा इराकलाई ४–१ ले हराएको थियो भने सोमबार सेनेगललाई ३–२ ले पराजित गरेको थियो ।

पहिलो पटक विश्वकप खेलिरहेका २५ वर्षीय हल्यान्डप्रतिको विश्वव्यापी ध्यानाकर्षणले उनलाई थप उत्साहित बनाएको छ । उनको आक्रामक र उत्साही खेलशैलीले फ्रान्सको अनुभवी प्रतिरक्षालाई पनि चुनौती दिन सक्छ ।