काठमाडौं। फिफा विश्वकप २०२६ को समूह चरण समाप्त भएसँगै सर्वाधिक गोलकर्ताको दौड पनि निकै रोमाञ्चक बनेको छ। उत्तर अमेरिकाका तीन राष्ट्र अमेरिका, मेक्सिको र क्यानडामा भइरहेको विश्वकपमा अर्जेन्टिनाका कप्तान लियोनल मेसी उत्कृष्ट लयमा देखिएका हुन्।

समूह चरणका तीन खेलमा ६ गोल गर्दै उनी सर्वाधिक गोलकर्ताको सूचीमा एकल रूपमा शीर्ष स्थानमा पुगेका छन्।

समूह चरणमा कुल तीन खेलाडीले ह्याट्रिक पूरा गरेका छन्। अर्जेन्टिनाका कप्तान लियोनल मेसी, सहआयोजक क्यानडाका जोनाथान डेभिड र फ्रान्सका उसमान डेम्बेलेले एक–एक ह्याट्रिक गर्दै आफ्नो टोलीको सफलतामा महत्वपूर्ण योगदान दिएका हुन्।

मेसीले समूह ‘जे’ अन्तर्गत पहिलो खेलमै अल्जेरियाविरुद्ध शानदार ह्याट्रिक गरेका थिए। त्यसक्रममा उनले जर्मनीका पूर्व स्ट्राइकर मिरोस्लाभ क्लोजको विश्वकपमा सर्वाधिक १६ गोलको कीर्तिमान बराबरी गरेका थिए। त्यसपछि अस्ट्रियाविरुद्ध दुई गोल थप्दै उनले विश्वकप इतिहासकै सर्वाधिक गोलकर्ता बन्ने नयाँ कीर्तिमान कायम गरे।

समूह चरणको अन्तिम खेलमा जोर्डनविरुद्ध दोस्रो हाफमा बेन्चबाट मैदान प्रवेश गरेका मेसीले अर्को गोल थप्दै आफ्नो विश्वकप गोल संख्या १९ पुर्‍याए। यससँगै उनले अर्को ऐतिहासिक उपलब्धि पनि हात पारे। सन् २०२२ को विश्वकपको अन्तिम चार खेलमा लगातार गोल गरेका मेसीले यस विश्वकपको समूह चरणका तीनवटै खेलमा पनि गोल गरेपछि विश्वकप इतिहासमा लगातार सात खेलमा गोल गर्ने पहिलो खेलाडी बने।

३९ वर्षको उमेरमा पनि उत्कृष्ट प्रदर्शन गरिरहेका मेसी यस विश्वकपमा गोल्डेन बुट अवार्डका सबैभन्दा बलिया दाबेदारका रूपमा उभिएका छन्। उनले यसअघि दुई पटक विश्वकपको उत्कृष्ट खेलाडी घोषित हुँदै गोल्डेन बल अवार्ड जितिसकेका भए पनि सर्वाधिक गोलकर्तालाई प्रदान गरिने गोल्डेन बुट भने जित्न सकेका छैनन्। यसपटक भने उनी त्यो प्रतीक्षित उपलब्धिबाट केही कदम मात्र टाढा देखिएका छन्।

मेसीपछि सर्वाधिक गोलकर्ताको सूचीमा फ्रान्सका कप्तान किलियन एमबाप्पे, उनका टोलीका सहकर्मी उसमान डेम्बेले, ब्राजिलका भिनिसियस जुनियर तथा नर्वेका एर्लिङ हालान्ड समान चार–चार गोलसहित रहेका छन्।

हालान्डले प्रतियोगिताको पहिलो दुई खेलमा दुई–दुई गोल गर्दै चार गोल पूरा गरेका थिए। तर समूह चरणको अन्तिम खेलमा फ्रान्सविरुद्ध उनले गोल गर्न सकेनन्। एमबाप्पेले पनि सुरुआती दुई खेलमा गोल गरे पनि नर्वेविरुद्ध गोल गर्न असफल भए। त्यही खेलमा भने डेम्बेलेले ह्याट्रिक गर्दै चार गोलको आँकडा पूरा गरेका थिए। एमबाप्पेको नाममा दुई असिस्ट समेत रहेकाले गोल्डेन बुटको प्रतिस्पर्धामा उनी पनि बलियो दाबेदार मानिएका छन्। उनले सन् २०२२ को कतार विश्वकपमा फाइनलमा ह्याट्रिकसहित आठ गोल गर्दै गोल्डेन बुट जितेका थिए।

ब्राजिलका स्टार फरवार्ड भिनिसियस जुनियरले पनि उत्कृष्ट प्रदर्शन जारी राखेका छन्। उनले समूह चरणका तीनवटै खेलमा गोल गर्दै विश्वकप इतिहासमा समूह चरणका तीनै खेलमा गोल गर्ने पाँचौँ ब्राजिलियन खेलाडी बन्ने उपलब्धि हासिल गरेका छन्। यति मात्र होइन, उनी तीनवटै खेलमा ‘प्लेयर अफ दि म्याच’ घोषित भएका थिए।

जर्मनीका डेनिस उन्डाभले तीन गोल गर्दै प्रभावशाली प्रदर्शन गरेका छन्। अधिकांश समय वैकल्पिक खेलाडीका रूपमा मैदान प्रवेश गरेका उनले दुई खेलमा गोल गर्नुका साथै दुई असिस्ट पनि दिएका छन्, जसले उनलाई प्रतियोगिताका सबैभन्दा प्रभावशाली ‘सुपर सब’ मध्ये एक बनाएको छ।

असिस्टतर्फ भने स्वीडेनका अलेक्जान्डर इसाक शीर्ष स्थानमा छन्। उनले समूह चरणमा तीन असिस्ट गर्दै आफ्नो टोलीको नकआउट यात्रामा महत्वपूर्ण भूमिका खेलेका छन्।

समूह चरण समाप्त भएसँगै अब नकआउट चरण सुरु हुँदैछ। उपाधि यात्रासँगै गोल्डेन बुटको प्रतिस्पर्धा पनि थप रोमाञ्चक बन्ने अपेक्षा गरिएको छ। मेसी आफ्नो ऐतिहासिक लय कायम राख्न चाहन्छन् भने एमबाप्पे, डेम्बेले, भिनिसियस र हालान्डजस्ता स्टार खेलाडीहरू उनलाई पछ्याउने तयारीमा छन्।