काठमाडौं । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनका क्रममा प्रधानमन्त्री वालेन्द्र शाह (बालेन) बसेको चितवनको एक रिसोर्टले उनले प्रयोग गरेको कोठालाई स्थायी रूपमा ‘प्रधानमन्त्री कक्ष’ नाम दिएको छ।

चितवनको कालिका नगरपालिका-९, शक्तिखोरस्थित लटौली सेन्चुरी रिसोर्टले प्रधानमन्त्री शाह सपरिवार बसेको भिल्ला ब्लकको कोठामा ‘‘प्राइम मिनिस्टर रुम’ लेखिएको विशेष नामफलक राखेको हो।

रिसोर्ट व्यवस्थापनले देशको कार्यकारी प्रमुखको पहिलो बसाइलाई स्मरणीय बनाउने उद्देश्यले यस्तो निर्णय गरिएको जनाएको छ।

रिसोर्टका व्यवस्थापकका अनुसार नामकरणपछि उक्त कोठा आगन्तुकहरूको विशेष आकर्षण बनेको छ। विशेषगरी प्रधानमन्त्री बालेनका समर्थक तथा अन्य पर्यटकहरूले सोही कोठामा बस्न अग्रिम बुकिङ गर्न थालेका छन्। कतिपय आगन्तुकले कोठाबाहिर तस्बिर खिच्ने क्रमसमेत बढेको रिसोर्टले जनाएको छ।

प्रधानमन्त्रीको बसाइसँगै रिसोर्ट सामाजिक सञ्जालमा पनि चर्चाको विषय बनेको छ। समर्थकहरूले यसलाई बालेनप्रतिको जनआस्था र लोकप्रियताको प्रतीकका रूपमा व्याख्या गरेका छन् भने केहीले रिसोर्टले आफ्नो प्रचार-प्रसार र ब्रान्ड प्रवर्द्धनका लागि अपनाएको व्यावसायिक रणनीति भएको टिप्पणी गरेका छन्।

महाधिवेशन अवधिभर प्रधानमन्त्री र उनको सचिवालयको सुरक्षाका लागि रिसोर्टका १६ भन्दा बढी कोठा चार दिनसम्म आरक्षित गरिएको थियो।

सोही अवधिमा प्रधानमन्त्री शाहले चितवनका स्थानीय नागरिक, उद्यमी तथा विभिन्न समूहसँग भेटघाट र अनौपचारिक संवादसमेत गरेका थिए।