काठमाडौं। प्रहरीले सवारीसाधनमा जडान गरिएका कालो सिसा हटाउने अभियान देशभर तीव्र बनाइरहेका बेला राष्ट्रिय स्वतन्त्र पार्टी (रास्वपा)का सभापति रवि लामिछानेसहित केही नेताहरूले प्रयोग गर्ने गाडीमा पनि कालो सिसा रहेको पाइएको छ।

प्रहरी प्रधान कार्यालयले मंगलबार सातै प्रदेशका राजमार्ग सुरक्षा तथा ट्राफिक व्यवस्थापन कार्यालयलाई सार्वजनिक तथा निजी सवारीसाधनमा जडान गरिएका कालो सिसा हटाउन सर्कुलर जारी गरेको थियो। सोही अभियानका बीच रास्वपाका सभापति, केही मन्त्री, सांसद तथा कार्यकर्ताले प्रयोग गर्ने सवारीमा कालो सिसा प्रयोग भएको देखिएको हो।

यसअघि असार १५ गते उपत्यका ट्राफिक प्रहरी कार्यालयले तत्कालीन गृहमन्त्री सुधन गुरुङ र गृह मन्त्रालयका सचिव राजकुमार श्रेष्ठले प्रयोग गरेको गाडीमा टाँसिएको कालो सिसाको स्टिकर हटाएको थियो।

ट्राफिक प्रहरीले असार १४ गतेदेखि काठमाडौं उपत्यकामा चल्ने निजी तथा सार्वजनिक सवारीसाधनमा जडान गरिएका कालो सिसाका स्टिकर हटाउने अभियान सुरु गरेको हो। पहिलो चरणमा स्टिकर हटाउने कार्य भइरहेको छ भने कम्पनीबाटै कालो सिसा जडान भएर आएका सवारीको सिसा परिवर्तन गर्ने विषयमा गाडी बिक्रेता कम्पनीहरूसँग पनि छलफल भइरहेको प्रहरीले जनाएको छ।

प्रहरीका अनुसार कालो सिसाले सवारीभित्रको गतिविधि बाहिरबाट देख्न कठिन हुने भएकाले सुरक्षा, अपराध नियन्त्रण तथा ट्राफिक व्यवस्थापनलाई प्रभावकारी बनाउन यस्तो अभियान सञ्चालन गरिएको हो।

तस्वीरहरू: