काठमाडौं। नेकपा (एमाले) का अध्यक्ष केपी शर्मा ओलीले पार्टी अहिले अप्ठेरो परिस्थितिबाट गुज्रिरहेको स्वीकार गर्दै त्यसको सामना गर्ने र प्रतिवाद गर्ने बताएका छन्।

पार्टी जागरण अभियान शुभारम्भ कार्यक्रममा बोल्दै उनले कठिनाइ राजनीतिक जीवनको स्वाभाविक हिस्सा भएको उल्लेख गरे। उनले अहिलेको परिस्थितिलाई अस्थायी चुनौतीका रूपमा व्याख्या गर्दै पार्टी कमजोर नभएको दाबी गरे।

ओलीले जीवनमा निर्जीव वस्तुलाई कठिनाइ नपर्ने भन्दै पार्टीमाथि आएको दबाबलाई जीवित राजनीतिक शक्तिको संकेतका रूपमा अर्थ्याए। उनका अनुसार कठिनाइले पार्टी समाप्त नभई अझ सशक्त रूपमा अघि बढ्ने आधार तयार गर्छ।

उनले भने, ‘हामी कठिनाइमा छौं। यतिबेला कठिनाइमा छौं। कठिनाइ भनेको जीवनमा आइपर्ने चिज हो। निर्जीव तत्वलाई कहिल्यै कठिनाइ पर्दैन। हाम्रो पार्टीलाई कठिनाइ आएको छ भनेको हामी जीवित छौं। हामीले धक्का खाएका छौं। हामी पछारिएका हौंला तर हामी जीवित छौं। हामी उठ्छौं। हामी प्रतिवाद गर्छौं। हामी प्रतिरोध पनि गर्छौं।’

ओलीले आफ्नो पार्टीमाथि पछिल्ला समय सबैभन्दा ठूलो राजनीतिक हमला भएको दाबी गरे। उनका अनुसार विभिन्न शक्तिहरूको गठजोडबाट एमालेमाथि दबाब सिर्जना गरिएको छ।

उनले पार्टीले विकास र प्रगति गर्न खोज्दा त्यसलाई रोक्ने प्रयास भएको उल्लेख गर्दै संगठनलाई कमजोर पार्ने प्रयासहरू भइरहेको आरोप लगाए। तर उनले यस्ता चुनौतीका बीच पनि एमाले अघि बढ्ने विश्वास व्यक्त गरे।