काठमाडौं । प्रधानमन्त्री वालेन्द्र शाह नेतृत्वको सरकारले पहिलो १०० दिनमा ६६६ जना बिचौलियालाई नियन्त्रणमा लिएको जनाएको छ।

शनिबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा सरकारका १०० दिनका उपलब्धि सार्वजनिक गर्दै सरकारका प्रवक्ता सस्मित पोखरेलले सम्पत्ति छानबिन आयोगमा हालसम्म ११ हजार उजुरी दर्ता भएको जानकारी दिए। ती उजुरीमाथि अनुसन्धान जारी रहेको र ६६६ जना बिचौलियालाई नियन्त्रणमा लिइएको उनले बताए।

प्रवक्ता पोखरेलका अनुसार सहकारी ठगीबाट प्रभावित बचतकर्तालाई राहत उपलब्ध गराउने अभियानअन्तर्गत १० वटा सहकारी संस्थामार्फत २ करोड ६३ लाख ९० हजार रुपैयाँ बचत रकम फिर्ता गरिएको छ।

यसैगरी, स्वास्थ्य सेवा विस्तारअन्तर्गत देशभरका १४ वटा संघीय अस्पतालमा जलन उपचार (बर्न युनिट) स्थापना गरिएको सरकारले जनाएको छ।

त्यस्तै, काठमाडौं उपत्यकाका विभिन्न सुकुम्बासी बस्तीबाट विस्थापित भएका ४६५ परिवारलाई प्रतिपरिवार राहत रकम वितरण गरिएको जानकारी पनि सरकारले दिएको छ। उक्त कार्यक्रम प्रभावित परिवारलाई तत्काल राहत उपलब्ध गराउने उद्देश्यले सञ्चालन गरिएको सरकारको भनाइ छ।