काठमाडौं। चितवनमा जंगली हात्तीको आक्रमणपछि भएको आगलागीमा आमा-छोराको मृत्यु भएको छ।

शनिबार राति करिब ११ बजे भरतपुर महानगरपालिका–२३ बेलहट्टास्थित पूर्ण बोटेको कच्ची घरमा जंगली हात्तीले आक्रमण गर्दा २५ वर्षीया आशिका बोटे र उनका चार वर्षीय छोरा भरत बोटेको ज्यान गएको हो।

भरतपुर महानगरपालिका–२३ का वडाध्यक्ष दीपक दवाडीका अनुसार हात्तीले घर भत्काउन थालेपछि घरधनी पूर्ण बोटेले हात्ती धपाउन आगो बाल्ने प्रयास गरेका थिए। सोही क्रममा आगो कच्ची घरमा सल्किएको प्रहरीले जनाएको छ।

घटनापछि स्थानीयवासी र प्रहरीको सक्रियतामा आगो नियन्त्रणमा लिइएको थियो। यद्यपि, घरभित्र रहेका आमा–छोरालाई जोगाउन नसकिएको जनाइएको छ।

घटनालगत्तै शनिबार राति नै चितवन राष्ट्रिय निकुञ्ज कार्यालय, स्थानीय जनप्रतिनिधि, नयाँ गोरखा गण, मध्यवर्ती उपभोक्ता समिति तथा नेपाल प्रहरीका प्रतिनिधिबीच आपत्कालीन छलफल भएको थियो।

छलफलमा निकुञ्ज कार्यालयमार्फत पीडित परिवारलाई तत्काल राहत उपलब्ध गराउने, क्षतिग्रस्त घर पुनर्निर्माणका लागि आवश्यक सहयोग गर्ने तथा घटनामा संलग्न जंगली हात्तीलाई नियन्त्रणमा लिन समन्वयात्मक रूपमा काम गर्ने सहमति भएको जनाइएको छ।

जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलले घटनास्थलमा आवश्यक कानुनी प्रक्रिया तथा मुचुल्का तयार गर्ने कार्य सम्पन्न भइसकेको जानकारी दिएका छन्।

पछिल्लो समय चितवनका मध्यवर्ती तथा वन आसपासका बस्तीमा जंगली हात्तीको प्रवेश बढ्दै जाँदा स्थानीयवासीको जनधनको सुरक्षाप्रति चिन्ता बढेको छ।

स्थानीयले मानव–वन्यजन्तु द्वन्द्व न्यूनीकरणका लागि प्रभावकारी तथा दीर्घकालीन उपाय अवलम्बन गर्न सम्बन्धित निकायसँग माग गर्दै आएका छन्।