काठमाडौं। राष्ट्रिय स्वतन्त्र पार्टी (रास्वपा)ले आफ्नो नयाँ विधानमार्फत पार्टीमा एकभन्दा बढी वरिष्ठ नेता रहने व्यवस्था गरेको छ।

असार दोस्रो साता चितवनमा सम्पन्न पहिलो महाधिवेशनबाट पारित विधानमा आवश्यकताअनुसार दुई वा सोभन्दा बढी वरिष्ठ नेता मनोनीत गर्न सकिने प्रावधान समावेश गरिएको हो।

विधानअनुसार पार्टीको नीति निर्माण, संगठन विस्तार तथा संस्थागत विकासमा दीर्घकालीन योगदान पुर्‍याएका र उच्च राजनीतिक अनुभव भएका नेतालाई पार्टी सभापतिको प्रस्तावमा केन्द्रीय समितिले ‘वरिष्ठ नेता’ मनोनीत गर्न सक्नेछ।

रास्वपाले वरिष्ठ नेताको मर्यादाक्रम पार्टी सभापतिपछिको दोस्रो स्थानमा रहने व्यवस्था पनि गरेको छ। यदि एकभन्दा बढी वरिष्ठ नेता भए उनीहरूको मर्यादाक्रम भने केन्द्रीय समितिले तोकेबमोजिम निर्धारण गरिने विधानमा उल्लेख छ।

पहिलो महाधिवेशन सम्पन्न भए पनि रास्वपाले हालसम्म वरिष्ठ नेता लगायतका केही पदाधिकारीको मनोनयन गरेको छैन।

पार्टीभित्र प्रधानमन्त्री बालेन्द्र शाहलाई वरिष्ठ नेताको जिम्मेवारी दिने विषयमा सहमति भएको चर्चा भइरहे पनि त्यसबारे पार्टीले औपचारिक निर्णय सार्वजनिक गरेको छैन।

नयाँ विधानले एकभन्दा बढी वरिष्ठ नेता नियुक्त गर्न सकिने बाटो खुला गरेकाले भविष्यमा बालेनसहित अन्य नेताहरूलाई पनि उक्त जिम्मेवारी दिइन सक्ने सम्भावना रहेको राजनीतिक वृत्तमा चर्चा छ।

यद्यपि, वरिष्ठ नेताको मनोनयन तथा त्यससम्बन्धी अन्तिम निर्णय पार्टीको केन्द्रीय समितिबाट हुने व्यवस्था विधानले गरेको छ।

यस्तो छ विधान: 

वरिष्ठ नेता
(१) पदको व्यवस्था र मनोनयनः
पार्टीको नीति निर्माण र साङ्गठनिक सुदृढीकरणमा लामो समयदेखि विशेष योगदान पुऱ्याएका तथा उच्च राजनीतिक अनुभव हासिल गरेका नेतालाई पार्टी सभापतिको प्रस्तावमा केन्द्रीय समितिले ‘वरिष्ठ नेता’ मनोनीत गर्न सक्नेछ ।
(२) मर्यादा तथा वरीयताक्रमः
पार्टीको साङ्गठनिक मर्यादाक्रम तथा केन्द्रीय समितिको बैठकलगायत सम्पूर्ण औपचारिक कार्यक्रमहरूमा वरिष्ठ नेताको वरीयता पार्टी सभापतिपछिको दोस्रो (द्वितीय) स्थानमा रहनेछ ।
(३) बहु-वरिष्ठ नेताको वरीयता निर्धारणः
मनोनीत वरिष्ठ नेताहरूको सङ्ख्या दुई वा दुईभन्दा बढी भएको अवस्थामा, निजहरूबीचको आपसी वरीयताक्रम केन्द्रीय समितिले निर्णय गरी निर्धारण गरेबमोजिम हुनेछ ।