अमेरिकी फुटबल स्टार फोलारिन बालोगुनलाई रातो कार्ड दिइ निकालेपछि हुने अर्को एक खेलको प्रतिबन्ध एक वर्षका लागि स्थगित गर्ने विवादास्पद निर्णयमा फिफाले सीमारेखा पार गरेको युरोपेली फुटबल महासङ्घ (युइएफए)ले सोमबार जनाएको छ ।

फिफाको यो निर्णय अमेरिकी राष्ट्रपति डोनाल्ड ट्रम्पको हस्तक्षेपपछि आएको भन्ने सामाजिक सञ्जाल तथा सञ्चारमाध्यमहरूमा उल्लेख छ । यसले बालोगुनलाई सोमबार भएको विश्वकप अन्तिम १६ को खेलमा बेल्जियमविरुद्ध मैदानमा उत्रन अनुमति दिएको छ ।

युइएफएको विज्ञप्तिमा भनिएको छ, “हिजो फोलारिन बालोगुनलाई दिइएको रातो कार्डपछि लागू हुने एक खेलको स्वतः प्रतिबन्धलाई एक वर्षका लागि स्थगित गर्ने निर्णयले सीमारेखा पार गरेको छ।”

युइएफएले भनेको छ, “फुटबल वा अन्य कुनै पनि खेल नियममा आधारित हुन्छ, जुन निष्पक्ष, इमानदार र पारदर्शी प्रतिस्पर्धाको आधार हो। कहिलेकाहीँ नियमको व्याख्या गर्न सकिन्छ, तर यो मामिलामा सकिँदैन।”

युइएफएले फिफाको निर्णयले खेलको समग्रतामा पर्न सक्ने प्रभावप्रति चेतावनी दिएको छ ।

“फुटबल विश्वको सबैभन्दा लोकप्रिय खेल हो किनकि यो सुन्दर खेल हो र विश्वभर एउटै नियमअनुसार खेलिन्छ भन्ने विश्वास गरिन्छ,” विज्ञप्तिमा भनिएको छ ।

महासङ्घले भनेको छ, “कुनै पनि प्रतियोगिता पूर्ण रूपमा अलग हुँदैन । यदि त्यो विश्वकप प्रतियोगितामा प्रश्न उठ्यो भने यसले समग्र खेलमा सकारात्मक वा नकारात्मक प्रभाव पार्न सक्छ ।”

“हामी यो अभूतपूर्व, अकल्पनीय र अस्वीकार्य निर्णयप्रति आश्चर्य र असन्तुष्टि व्यक्त गर्दछौँ,” युइएफएले भनेको छ।

बालोगुनले विश्वकपमा तीन गोल गरिसक्नुभएको छ । बोस्निया–हर्जेगोभिनाविरुद्धको ३२ समूह चरणको खेलमा अमेरिकाले २–० गोलले जित निकालेको थियो । खेलका क्रममा प्रतिद्वन्द्वी खेलाडीको खुट्टामा टेकेको भन्दै भिडियो रिभ्यूपछि बालोगुनलाई सिधा रातो कार्ड दिइएको थियो ।

फिफा नियमअनुसार सिधा रातो कार्डले स्वतः एक खेलको प्रतिबन्ध निम्त्याउँछ ।

ट्रम्पले फिफा अध्यक्ष जियानी इन्फान्टिनोलाई बालोगुनको सजाय पुनरावलोकन गर्न आग्रह गरेको यस बिषयमा जानकारी दुई स्रोतले बताएका छन्।
अमेरिकी विदेशमन्त्री मार्को रुबियोले पनि सार्वजनिक रूपमा कार्ड खारेज गर्न माग गर्नुभएको थियो ।

फिफाको अनुशासन समितिले प्रतिबन्ध स्थगित गर्ने निर्णय गरेको छ ।

फिफाले आइतबार प्रतिबन्ध एक वर्षका लागि स्थगित गरिएको घोषणा गरेको थियो । यो निर्णय कुनै स्पष्ट कारणबिना नै लिइएको थियो ।

ट्रम्पले आफ्नो ट्रुथ सोसल प्लेटफर्ममा लेख्नुभएको छ, “फिफालाई धन्यवाद, जसले सही काम ग¥यो र ठूलो अन्यायलाई उल्टायो!”

बेल्जियमको फुटबल टोलीले भने यो निर्णयबाट आफूहरू स्तब्ध भएको जनाएको छ ।

बेल्जियमका प्रशिक्षक रुडी गार्सियाले निर्णय लिने फिफा समितिप्रति व्यङ्ग्य गर्दै भन्नुभयो, “मलाई थाहा थिएन कि फिफा विश्वकपमा ५ जुलाईलाई १ अप्रिल बनाइएको रहेछ र आज ‘अप्रिल फुल’ डे रहेछ ।”