काठमाडाैं। विश्वकपको फाइनल अब केही घण्टामै हुँदैछ। स्पेन आफ्नो दोस्रो विश्वकप उपाधिबाट केवल एक जित टाढा छ। स्पेनका लागि यो कुनै असाधारण प्रदर्शन गर्ने खेल नभई प्रतियोगिताभर देखाएको खेलशैली, धैर्य र आत्मविश्वासलाई निरन्तरता दिने अवसर हो। टोलीभित्र विश्वास छ कि अहिलेसम्म जसरी खेलिएको छ, त्यसैलाई दोहोर्याउन सके उपाधि जित्ने सम्भावना बलियो छ।

स्पेनले यस विश्वकपमा सातै खेलमा आफूलाई पछि पर्न दिएको छैन। समूह चरणमा केप भर्डेसँग बराबरी खेलेपछि पनि टोलीले आफ्नो रणनीति परिवर्तन गरेन। नकआउट चरणमा पोर्चुगल र बेल्जियमविरुद्ध अन्तिम समयसम्म संघर्ष गर्दै जित निकाल्यो भने सेमिफाइनलमा फ्रान्समाथि प्रभावशाली प्रदर्शन गर्दै फाइनलमा स्थान सुरक्षित गर्यो। प्रतियोगिताभर स्पेनको सबैभन्दा ठूलो विशेषता सामूहिक खेल, मानसिक दृढता र आफ्नो पहिचानप्रतिको अडिग विश्वास बनेको छ।

प्रशिक्षक लुइस दे ला फुएन्तेको टोली सधैं बल आफ्नो नियन्त्रणमा राख्दै खेलमाथि प्रभुत्व जमाउने शैलीमा विश्वास गर्छ। परिस्थिति जस्तोसुकै भए पनि स्पेनले आफ्नो रणनीति परिवर्तन नगर्ने संकेत देखाएको छ। फाइनलमा अर्जेन्टिनाविरुद्ध सुरुआती दबाब वा पछि पर्ने अवस्था आए पनि टोली आफ्नो खेलशैलीबाट विचलित नहुने विश्वास स्पेनिस टोलीमा देखिन्छ।

यद्यपि, स्पेनका लागि सबैभन्दा ठूलो चुनौती साविक विश्वविजेता अर्जेन्टिना हुनेछ। लियोनेल मेस्सी उत्कृष्ट लयमा छन् र प्रतियोगिताभर निर्णायक प्रदर्शन गरेका छन्। उनी कुनै पनि क्षण खेलको नतिजा बदल्न सक्ने खेलाडी भएकाले स्पेनले विशेष सतर्कता अपनाउनुपर्नेछ। तर स्पेनको ध्यान केवल मेस्सीमा मात्र होइन, अर्जेन्टिनाको सम्पूर्ण टोलीमा हुनेछ।

विशेषगरी जुलियन आल्भारेजलाई स्पेनले निकै खतरनाक खेलाडीका रूपमा हेरिरहेको छ। उनी परम्परागत स्ट्राइकर मात्र होइन, खेल निर्माण गर्ने, विङमा खेल्ने र आवश्यक पर्दा पेनाल्टी क्षेत्रभित्र पुगेर गोल गर्ने क्षमता भएका बहुआयामिक खेलाडी हुन्। लगातार दौडिने, खाली स्थान सिर्जना गर्ने र दुवै खुट्टाले उत्कृष्ट प्रहार गर्न सक्ने उनको क्षमताले अर्जेन्टिनाको आक्रमण अझ बलियो बनाएको छ।

स्पेनको अर्को बलियो पक्ष भनेको उसको रक्षात्मक संयोजन हो। प्रतियोगिताभर टोलीले केवल एक गोल मात्र व्यहोरेको छ। रोड्री र फाबियान रुइजले मिडफिल्डमा उत्कृष्ट सुरक्षा दिएका छन् भने लामिन यामाल, एलेक्स बाएना, मिकेल ओयारजाबाल, पेड्रो पोरो र मार्क कुकुरेलालगायतका खेलाडीले आक्रमणसँगै रक्षामा पनि उत्तिकै योगदान दिएका छन्। बल गुम्नेबित्तिकै सबै खेलाडी रक्षात्मक भूमिकामा फर्किने टोलीको सामूहिक मानसिकताले स्पेनलाई सन्तुलित बनाएको छ।

प्रतियोगिताको सुरुआतमा केही खेलाडी पूर्ण रूपमा फिट नभए पनि विश्वकप अघि बढ्दै जाँदा टोलीको लय, आत्मविश्वास र फिटनेस दुवैमा सुधार आएको छ। लगातारको जितले पनि स्पेनलाई मनोवैज्ञानिक रूपमा बलियो बनाएको छ।

अब स्पेनका लागि लक्ष्य एउटै छ-प्रतियोगिताभर देखाएको अनुशासन, धैर्य र सामूहिक खेललाई फाइनलमा पनि कायम राख्ने। अर्जेन्टिनाविरुद्धको उपाधि भिडन्त सहज नहुने निश्चित छ, तर स्पेन विश्वकपकै आफ्नो उत्कृष्ट लयमा मैदानमा उत्रिने विश्वासमा छ। यही प्रदर्शन दोहोर्याउन सके सन् २०१० पछि स्पेनले दोस्रो पटक विश्वकप ट्रफी उचाल्ने सपना साकार हुन सक्छ।

(एक स्पेनिस लेखकले लेखेको यो लेख बिबिसीबाट अनुवाद गरिएको हो)