काठमाडौं। अर्थमन्त्री डा. स्वर्णिम वाग्लेले प्रधानमन्त्री र मन्त्रीहरू दल तथा पार्टी नेतृत्वप्रति उत्तरदायी हुनुपर्ने बताएका छन्। मंगलबार दिएको उनको यो अभिव्यक्तिलाई पछिल्ला दिनमा प्रधानमन्त्री बालेन्द्र शाह (बालेन) र अर्थमन्त्रीबीच सम्बन्ध चिसिएको चर्चासँग जोडेर हेरिएको छ।

राजनीतिक वृत्तमा प्रधानमन्त्री बालेन पार्टीका गतिविधिमा कम सक्रिय रहने, पार्टी कार्यालय तथा संसदमा पनि कम उपस्थित हुने चर्चा भइरहेका बेला अर्थमन्त्री वाग्लेको टिप्पणी सार्वजनिक भएको हो।

यता सरकारभित्र प्रधानमन्त्री बालेन र अर्थमन्त्री वाग्लेबीच मतभेद बढेको चर्चा पनि चलिरहेको छ। बजेटअघि करका दरसम्बन्धी सूचना चुहिएको आरोप, त्यसपछि चीनबाट ठूलो संख्यामा विद्युतीय सवारीसाधन आयात भएको विषय तथा अर्थ मन्त्रालयअन्तर्गतका निकायमा भएका नियुक्तिलगायत विषयलाई लिएर प्रधानमन्त्री असन्तुष्ट रहेको दाबी हुँदै आएको छ। यद्यपि यी दाबीबारे सरकारले औपचारिक पुष्टि गरेको छैन।

यसैबीच आइतबार पार्टी सभापति रवि लामिछाने र अर्थमन्त्री वाग्लेबीच काभ्रेको एक रिसोर्टमा लामो छलफल भएको पनि स्रोतहरूले बताएका छन्। त्यसअघि गत असार २८ गते प्रधानमन्त्री बालेन र सभापति लामिछानेबीच बूढानीलकण्ठस्थित निवासमा भेटवार्ता भएको थियो।

प्रधानमन्त्री निकट स्रोतका अनुसार उक्त भेटमा बालेनले अर्थमन्त्री वाग्लेसहित केही मन्त्रीलाई हटाउने प्रस्ताव राखेका थिए। तर, त्यसमा सभापति लामिछाने सहमत नभएको दाबी गरिएको छ। यसबारे सम्बन्धित पक्षले भने औपचारिक प्रतिक्रिया दिएका छैनन्।

यसै परिप्रेक्ष्यमा अर्थमन्त्री वाग्लेले प्रधानमन्त्री र मन्त्रीहरू दल तथा नेतृत्वप्रति उत्तरदायी हुनुपर्ने अभिव्यक्ति दिएका हुन्, जसले सरकारभित्रको आन्तरिक समीकरणबारे थप चर्चा उत्पन्न गरेको छ।