एजेन्सी। अमेरिकाले युक्रेनका लागि छुट्याएको करिब ४० करोड अमेरिकी डलर बराबरको सैन्य सहायता रोकिएको खुलासा भएपछि राष्ट्रपति प्रशासनमाथि नयाँ प्रश्न उठेको छ।

अमेरिकी सिनेटमा भएको सुनुवाइका क्रममा वरिष्ठ सिनेटर डिक डर्बिनले कंग्रेसबाट स्वीकृत सहायता ह्वाइट हाउसले रोकिदिएको दाबी गरेका हुन्।

डर्बिनका अनुसार जनवरीमा स्वीकृत उक्त सहायता प्याकेज तत्काल कार्यान्वयन हुने अपेक्षा गरिए पनि प्रशासनले कम्तीमा सन् २०२९ सम्म उपलब्ध नहुने जानकारी दिएको छ। यो निर्णयले युद्धग्रस्त युक्रेनलाई आवश्यक सैन्य सहयोग थप अनिश्चित बनेको विश्लेषण गरिएको छ।

रोकिएको सहायता ‘युक्रेन सेक्युरिटी असिस्टेन्स इनिसिएटिभ’ अन्तर्गतको हो, जसबाट युक्रेनी सेनाका लागि प्रशिक्षण, सैन्य उपकरण खरिद, रणनीतिक सहयोग तथा परामर्श प्रदान गर्ने योजना थियो। तर स्वीकृत भइसकेको रकम अझै युक्रेन नपुगेको डर्बिनले बताएका छन्।

सिनेट सुनुवाइका क्रममा उनले अमेरिकी संयुक्त सैन्य प्रमुख जनरल ड्यान केनसँग यसबारे स्पष्टीकरण मागेका थिए। तर जनरल केनले सहायता रोकिएको विषयमा आफूलाई जानकारी नभएको बताउँदै यसबारे नागरिक नेतृत्व अर्थात् ह्वाइट हाउससँग नै प्रश्न गर्नुपर्ने जवाफ दिएका थिए।

ह्वाइट हाउसले भने सहायता रोकिएको विषयमा अहिलेसम्म कुनै औपचारिक प्रतिक्रिया सार्वजनिक गरेको छैन। यसले प्रशासनको रणनीतिमाथि थप जिज्ञासा उत्पन्न गरेको छ।

यसअघि अमेरिकी सञ्चारमाध्यमहरूले इरानसँगको युद्धपछि अमेरिकी सैन्य भण्डार पुनः भर्न युक्रेनका लागि छुट्याइएको केही स्रोतसाधन पुनः विनियोजन गर्न सकिने सम्भावनाबारे समाचार सार्वजनिक गरेका थिए। यद्यपि सरकारले त्यसबारे आधिकारिक पुष्टि गरेको छैन।

राष्ट्रपति डोनाल्ड ट्रम्पले पछिल्लो समय युक्रेनलाई दिइने सैन्य सहयोगको आर्थिक भार अब युरोपेली सहयोगी राष्ट्रहरूले बढी वहन गर्नुपर्ने धारणा दोहोर्याउँदै आएका छन्। अमेरिका एक्लैले दीर्घकालसम्म यस्तो खर्च उठाउन नसक्ने उनको तर्क रहँदै आएको छ।

उता युक्रेनी राष्ट्रपति भोलोदिमिर जेलेन्स्कीले हतियार र सैन्य सामग्रीको आपूर्तिमा भइरहेको ढिलाइले युद्धक्षेत्रमा आफ्ना सेनामाथि दबाब बढ्दै गएको बताउँदै पश्चिमी सहयोगी राष्ट्रहरूको भूमिकाप्रति असन्तुष्टि जनाएका छन्।

रूसले भने विदेशी सैन्य सहयोगले युद्धको अवधि मात्र लम्ब्याउने दाबी गर्दै आएको छ। मस्कोका अनुसार पश्चिमी मुलुकबाट आउने हतियारले रूसको रणनीतिक उद्देश्य परिवर्तन गर्न नसक्ने भएकाले यस्ता सहयोगले समाधानभन्दा द्वन्द्वलाई अझ लम्ब्याउने काम मात्र गरिरहेको छ।

अमेरिकी सहायता रोकिएको समाचार सार्वजनिक भएसँगै युक्रेनलाई पश्चिमी सैन्य सहयोगको भविष्य र त्यसको प्रभावबारे अन्तर्राष्ट्रिय स्तरमा नयाँ बहस सुरु भएको छ।