काठमाडौं। राष्ट्रिय स्वतन्त्र पार्टी (रास्वपा) का प्रतिनिधिसभा सदस्य बब्लु गुप्ता गुडिरहेको मोटरसाइकलमा उभिएर यात्रा गरेको भिडियो सामाजिक सञ्जालमा भाइरल बनेपछि उनी आलोचनामा परेका छन्।

भिडियोमा उनी हेल्मेट नलगाई मोटरसाइकलको पछाडिको भागमा उभिएर मोबाइल चलाइरहेको देखिन्छ।

सिरहा निर्वाचन क्षेत्र नम्बर १ बाट निर्वाचित सांसद तथा पूर्वमन्त्री गुप्ताको उक्त भिडियो सार्वजनिक भएसँगै सामाजिक सञ्जालमा व्यापक प्रतिक्रिया आएको छ।

सार्वजनिक पदमा रहेका व्यक्तिले नै सडक सुरक्षासम्बन्धी आधारभूत नियम उल्लंघन गरेको भन्दै धेरैले आपत्ति जनाएका छन्। आलोचकहरूले सांसदजस्ता जिम्मेवार व्यक्तिले ट्राफिक नियम पालना गर्दै नागरिकलाई सकारात्मक सन्देश दिनुपर्ने बताएका छन्।

घटनाबारे प्रतिक्रिया दिँदै सांसद गुप्ताले आफूबाट ट्राफिक नियम उल्लंघन भएको स्वीकार गरेका छन्। उनले कानुनी कारबाही भोग्न तयार रहेको बताउँदै सम्बन्धित मोटरसाइकललाई जरिवानाका लागि ट्राफिक प्रहरी कार्यालय पठाइसकेको जानकारी दिएका छन्।

उनका अनुसार उक्त घटना एक कार्यक्रममा सहभागी हुन भसुवातर्फ जाने क्रममा भएको थियो। उनले यसबाहेक घटनामा अन्य कुनै विशेष विषय नरहेको बताएका छन्।

सांसद गुप्ताले गल्ती स्वीकार गरे पनि उनको भिडियो सामाजिक सञ्जालमा निरन्तर शेयर भइरहेको छ।