काठमाडौं। बलिउड अभिनेता आमिर खानका सौतेनी भाइ हैदर अली खानमाथि उनकी पूर्वपत्नी तथा अभिनेत्री ईभा ग्रोभरले गम्भीर आरोप लगाएकी छन्।

हालै एक पोडकास्टमा बोल्दै ईभाले हैदरले आफ्नो मानसिक स्वास्थ्यसम्बन्धी अवस्था विवाहअघि लुकाएको, त्यसपछि आफूले घरेलु हिंसा, मानसिक यातना र अस्वीकार्य दबाब झेल्नुपरेको दाबी गरेकी हुन्।

ईभाका अनुसार विवाहपछि केही समयमै हैदरको व्यवहार असामान्य बन्दै गयो। त्यसपछि मात्रै उनी स्किजोफ्रेनिया (मानसिक स्वास्थ्यसम्बन्धी गम्भीर अवस्था) बाट पीडित रहेको थाहा पाएको उनले बताइन्। त्यसपछि हैदर हिंसात्मक बन्दै गएको र आफूले शारीरिक दुर्व्यवहारसमेत सहनुपरेको उनको आरोप छ।

उनले परिवार जोगाउने उद्देश्यले सम्बन्ध टिकाउने प्रयास गरेको बताउँदै दोस्रो अवसर पनि दिएको उल्लेख गरिन्। तर त्यसपछि हैदरले आफूलाई फिल्म उद्योगमा कामका लागि अन्य व्यक्तिसँग शारीरिक सम्बन्ध राख्न दबाब दिन थालेको दाबी उनले गरेकी छन्।

ईभाका अनुसार फिल्म क्षेत्रमा यस्ता प्रस्ताव नयाँ नभए पनि आफ्नै श्रीमानबाट यस्तो कुरा सुन्नु आफ्नो जीवनकै सबैभन्दा पीडादायी अनुभव थियो। उनले हैदरले घरखर्च, बिजुलीको बिल र बच्चाको आवश्यकताको बहाना बनाएर आफूलाई सम्झौता गर्न दबाब दिने गरेको आरोप लगाइन्। यही घटनापछि सम्बन्ध अन्त्य गर्ने निर्णयमा पुगेको उनले बताएकी छन्।

ईभाले धेरै वर्षअघि नै हैदरसँग सम्बन्धविच्छेद गरिसकेको जानकारी दिँदै अहिले पनि हैदरको अवस्था दयनीय रहेको दाबी गरेकी छन्। उनका अनुसार हैदरसँग स्थायी बसोबासको घरसमेत छैन र दैनिक जीवनयापन गर्नसमेत कठिनाइ भइरहेको छ।

यसअघि पनि ईभाले हैदरमाथि फिल्म उद्योगमा अवसर दिलाउने नाममा निर्देशक तथा निर्मातासँग सम्झौता गर्न दबाब दिएको आरोप सार्वजनिक गरेकी थिइन्। पछिल्लो अन्तर्वार्तामा उनले वैवाहिक जीवनभर मानसिक, आर्थिक र शारीरिक पीडा भोग्नुपरेको दाबी दोहोर्याएकी छन्।