काठमाडौं। रसुवा जाने सडकमा यात्रा गर्ने अधिकांश यात्रु केहीबेरका लागि गाडी रोक्न बाध्य हुन्छन्। एकातिर त्रिशूली नदीको अविरल बहाव र अर्कोतिर अग्लो भीरबाट झर्ने भाङ्गे झरनाको मनमोहक दृश्यले यात्रुलाई सहजै आकर्षित गर्छ। वर्षायामसँगै झरनामा पानीको बहाव बढेपछि यतिबेला यसको सौन्दर्य झन् मनमोहक बनेको छ।

रसुवाको उत्तरगया गाउँपालिका–२ मा रहेको भाङ्गे झरना चीनसँग जोडिने बेत्रावती-मैलुङ-स्याफ्रुवेशी सडकखण्डमै पर्छ। करिब १८१ मिटर अग्लो भीरबाट खस्ने यो झरना पछिल्ला केही वर्षयता आन्तरिक पर्यटकको रोजाइको गन्तव्य बन्दै गएको छ।

पहिले सीमित यात्रुले मात्रै अवलोकन गर्ने यस झरनामा अहिले दैनिक दर्जनौँदेखि सयौँ पर्यटक पुग्ने गरेका छन्। स्थानीयका अनुसार २०७९ सालपछि सामाजिक सञ्जालमा झरनाका तस्बिर र भिडियो व्यापक रूपमा फैलिन थालेसँगै यहाँ आउने पर्यटकको सङ्ख्या उल्लेखनीय रूपमा बढेको हो।

उत्तरगया गाउँपालिका–२ का वडाध्यक्ष टुकुप्रसाद सुवेदीका अनुसार सामान्य दिनमा दैनिक ३० देखि १०० जनासम्म पर्यटक झरना अवलोकन गर्न आउने गर्छन्। सार्वजनिक बिदा तथा शुक्रबार–शनिबार भने यो सङ्ख्या ५०० सम्म पुग्ने गरेको छ। झरना आसपास होटल र होमस्टे सञ्चालनमा रहेकाले पर्यटकलाई खानपिन तथा बसोबासमा समेत सहज भएको उनले बताए।

बढ्दो पर्यटक चापलाई मध्यनजर गर्दै चालु आर्थिक वर्षमा झरना क्षेत्रको पूर्वाधार विकासका लागि प्रदेश सरकार र स्थानीय तहबाट ४० लाख रुपैयाँ बजेट विनियोजन गरिएको छ। उक्त बजेटबाट पर्यटकमैत्री संरचना निर्माण र क्षेत्रको व्यवस्थापनलाई थप व्यवस्थित बनाइने जनाइएको छ।

भाङ्गे झरनाबाट खसेको पानी तल रहेको प्राकृतिक तलाउमा जम्मा हुन्छ। यही तलाउमा धेरै पर्यटक पौडी खेल्दै रमाउने गर्छन्। त्यसपछि झरनाको पानी त्रिशूली नदीमा मिसिन्छ, जसले यस क्षेत्रको प्राकृतिक सौन्दर्यलाई थप आकर्षक बनाएको छ।

भाङ्गे झरनाको मुख्य आकर्षण वर्षायाममै देखिन्छ। विशेषगरी असार, साउन र भदौमा पानीको बहाव अत्यधिक हुने भएकाले झरना पूर्ण आकारमा देखिन्छ। वर्षा सकिएसँगै पानीको मात्रा क्रमशः घट्दै जान्छ र हिउँदमा कतिपय समय झरना लगभग सुक्ने अवस्थासम्म पुग्ने भएकाले यसको आकर्षण मौसमी रूपमा सीमित हुने गरेको छ।

काठमाडौँको टोखाबाट करिब ७० किलोमिटर र नुवाकोट सदरमुकाम विदुरबाट करिब १८ किलोमिटर दूरीमा रहेको यो झरनामा पुग्न सहज सडक पहुँच छ। पर्यटकका लागि झरना नजिकै भ्यू–पोइन्टसमेत निर्माण गरिएको छ, जहाँबाट झरनाको मनोरम दृश्य अवलोकन गर्न सकिन्छ।

सामाजिक सञ्जालबाट चर्चामा आएको भाङ्गे झरना अहिले रसुवा प्रवेश गर्ने यात्रुका लागि मात्र होइन, छुट्टै गन्तव्यका रूपमा समेत स्थापित हुँदै गएको छ।

तस्वीरहरू: