काठमाडौं । नेकपा एमाले र नेपाली कम्युनिस्ट पार्टी (नेकपा) बीच प्रदेश सरकारहरूमा सहकार्य गर्दै सत्ता साझेदारी गर्ने सहमति भएको छ। शनिबार दुई दलका शीर्ष नेताबीच भएको छलफलपछि पाँच प्रदेशमा सरकार गठन र नेतृत्व बाँडफाँटसम्बन्धी लिखित सहमति भएको हो।

सहमतिपत्रमा नेकपा एमालेका अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ले हस्ताक्षर गरेका छन्। सहमतिअनुसार दुवै दलले प्रदेश सरकारहरूलाई स्थायित्व दिने, विकास निर्माणका कामलाई प्रभावकारी बनाउने तथा साझा न्यूनतम कार्यक्रमका आधारमा सरकार सञ्चालन गर्ने प्रतिबद्धता जनाएका छन्।

सत्ता साझेदारीको समझदारीअनुसार कोशी, बागमती र लुम्बिनी प्रदेश सरकारको नेतृत्व नेकपा एमालेले गर्नेछ। त्यस्तै कर्णाली र सुदूरपश्चिम प्रदेश सरकारको नेतृत्व नेकपाले गर्ने सहमति भएको छ।

दुवै दलले सरकारको नेतृत्व गर्ने प्रदेशमा मन्त्रिपरिषद् गठन, मन्त्रालय बाँडफाँट तथा साझा नीति–कार्यक्रमका विषयमा आपसी समझदारीका आधारमा निर्णय गर्ने जनाइएको छ। प्रदेश सरकारहरूलाई थप प्रभावकारी, जनउत्तरदायी र स्थिर बनाउने उद्देश्यले सहकार्य गरिएको नेताहरूले बताएका छन्।

शीर्ष नेताहरूबीच भएको छलफलमा प्रदेश सरकारहरूको कार्यसम्पादन, विकास आयोजना कार्यान्वयन, सेवा प्रवाहमा सुधार तथा केन्द्र र प्रदेशबीचको समन्वयलाई थप प्रभावकारी बनाउने विषयमा समेत छलफल भएको स्रोतले जनाएको छ।

यस सहमतिसँगै प्रदेश सरकारहरूको नयाँ राजनीतिक समीकरण स्पष्ट भएको छ। दुवै दलले प्रदेश तहमा सहकार्यलाई दीर्घकालीन बनाउँदै साझा राजनीतिक एजेन्डालाई अगाडि बढाउने प्रतिबद्धता व्यक्त गरेका छन्।

राजनीतिक वृत्तमा यो सहमतिलाई आगामी प्रदेश सरकारहरूको स्थायित्व र सत्ता समीकरणमा महत्वपूर्ण मोडका रूपमा हेरिएको छ। अब सम्बन्धित प्रदेशहरूमा मुख्यमन्त्री चयन, मन्त्रिपरिषद् विस्तार तथा सत्ता साझेदारीको विस्तृत खाका कार्यान्वयनतर्फ प्रक्रिया अघि बढ्ने अपेक्षा गरिएको छ।