काठमाडौं। बालेन्द्र शाह नेतृत्वको सरकारले नागढ़ुंगा-सिस्ने खोला सुरुङ मार्गको शिलालेखबाट केपी शर्मा ओलीको नाम हटाउन निर्देशन दिएको छ। 

२०७६ कात्तिक ४ गते तत्कालीन प्रधानमन्त्री ओलीले शिलान्यास गरेको यस राष्ट्रिय गौरवको आयोजनाको शिलालेखबाट उनको नाम हटाउने तयारी गरिएको हो। 

सुरुङ निर्माणमा संलग्न प्राविधिक स्रोतका अनुसार वर्तमान प्रधानमन्त्री बालेन्द्र शाह नेतृत्वको सरकारले उद्घाटनअघि शिलालेख परिवर्तन गरी तत्कालीन प्रधानमन्त्रीको नाम हटाउन निर्देशन दिएको दाबी गरिएको छ। सरकारको यो कदम आयोजना सुरु गर्ने नेतृत्वको योगदानलाई ओझेल पार्ने र नामै मेटाउने प्रयास हो। 

एमाले महासचिव शंकर पोखरेलले पनि सरकारको यो कदमको विरोध गर्दै, ‘शिलालेखबाट नाम मेट्न सकिएला, तर इतिहास मेट्न सकिँदैन,’ भन्दै कटाक्ष गरेका छन्। 

नेपालमा पहिलोपटक सडक सुरुङ निर्माण गर्ने अवधारणा अघि सार्ने, जापानसँग सहकार्य गरी आयोजना अगाडि बढाउने र शिलान्यास गर्ने नेतृत्व ओलीकै भएकाले उनको नाम हटाउने प्रयास राजनीतिक पूर्वाग्रहबाट प्रेरित भएको आरोप लागिरहेको छ। 

करिब सात वर्षको कठिन निर्माण यात्रापछि सम्पन्न भएको यो ऐतिहासिक पूर्वाधार आयोजनाको उद्घाटन हुन लागेका बेला शिलालेखबाट नाम हटाउने विषयले सरकारमाथि इतिहासलाई राजनीतिक हिसाबले पुनर्लेखन गर्न खोजेको आरोप लाग्दै चौतर्फी आलोचना भइरहेको हो।