काठमाडौं। टिकटकर तुलसा अधिकारी भनेर चिनिने तुलसी अधिकारीविरुद्ध दायर मुद्दामा बिहीबार ललितपुर जिल्ला अदालतमा प्रारम्भिक सुनुवाइ हुँदैछ।

अधिकारीविरुद्ध दायर सम्पत्ति शुद्धीकरण, आपराधिक लाभ तथा ठगीसम्बन्धी मुद्दाको सुनुवाइ जिल्ला न्यायाधीश भगवती शर्मा ढुंगानाको इजलासमा हुने भएको हो। उनी हाल पुर्पक्षका लागि थुनामा रहेकी छन्।

यसअघि ललितपुर जिल्ला अदालतका न्यायाधीश टेकनाथ गौतमको इजलासले प्राप्त प्रमाणका आधारमा अधिकारीलाई पुर्पक्षका लागि थुनामा पठाउने आदेश गरेको थियो।

अधिकारीविरुद्ध २०८२ चैतमा सरकारी वकिल कार्यालयले ६ करोड ५२ लाख २९ हजार रुपैयाँ बिगो कायम गरी मुद्दा दायर गरेको थियो। मुद्दामा अधिकारीसहित १० जना प्रतिवादी छन्।

अधिकारीलाई इन्टरपोलबाट रेड नोटिस जारी भएपछि अन्तर्राष्ट्रिय प्रहरी संगठनको सहयोगमा थाइल्याण्डबाट पक्राउ गरी नेपाल ल्याइएको थियो।

अधिकारीविरुद्ध जाहेरी दिने ललितपुरका एक व्यवसायीले आफूलाई बलात्कार मुद्दामा फसाइदिने धम्की दिँदै निरन्तर ब्ल्याकमेलिङ गरेको आरोप लगाएका छन्। ब्ल्याकमेलिङमार्फत अधिकारीले आफूसँग करिब ४ करोड ५० लाख रुपैयाँ बराबरको नगद तथा जिन्सी लिएको दाबी पनि जाहेरीमा गरिएको छ।

अब बिहीबारको सुनुवाइमा अदालतले मुद्दासँग सम्बन्धित प्रारम्भिक कानुनी तथा प्रक्रियागत विषयमा छलफल गर्नेछ।