काठमाडौं। सरकारले रिक्त रहेका २० वटा नेपाली नियोगमा राजदूत नियुक्तिका लागि सिफारिस प्रक्रिया अघि बढाउने तयारी गरेको छ।

परराष्ट्र मन्त्रालयले प्राप्त आवेदनहरूको अध्ययन गरिरहेको र उपयुक्त उम्मेदवार छनोट गरी आगामी सातासम्म सिफारिस गर्ने तयारी गरेको हो।

खुला आवेदन आह्वान गरेर राजदूत नियुक्तिका लागि सिफारिस गर्न लागिएको यो पहिलोपटक हो। मन्त्रालयमा प्राप्त ३ हजारभन्दा बढी आवेदनमध्येबाट योग्य तथा उपयुक्त उम्मेदवार छनोट गरिनेछ।

हाल भारत, अमेरिका, चीन, अस्ट्रेलिया, जर्मनी, इजरायल, जापान, दक्षिण कोरिया, मलेसिया, ओमान, कतार, रुस, साउदी अरब, श्रीलंका, बेलायत र स्पेनस्थित नेपाली दूतावासमा राजदूत पद रिक्त छ।

यसैगरी कार्यकाल पूरा गरेपछि केही समयका लागि म्याद थप गरेर राजदूतहरूले काम गरिरहेका इजिप्ट, बहराइन, बंगलादेश, म्यानमार तथा संयुक्त राष्ट्रसंघीय नियोग भियनामा पनि नयाँ राजदूत नियुक्त गर्नुपर्ने अवस्था छ। यी सबैलाई जोड्दा २० वटा नियोगमा राजदूत नियुक्त गर्नुपर्ने देखिन्छ।

नेपालका २८ वटा राजदूतावास छन्। संयुक्त राष्ट्रसंघका लागि न्यूयोर्क, जेनेभा र भियनामा गरी तीन स्थायी नियोग छन् भने आठवटा महावाणिज्य दूतावास छन्। यसरी नेपालका विदेशस्थित कुल ३९ नियोग सञ्चालनमा छन्।

सरकारले चालु आर्थिक वर्षदेखि दक्षिण अफ्रिका, ब्राजिल र डेनमार्कस्थित नेपाली दूतावास भने बन्द गरिसकेको छ।

हाल न्यूयोर्क, जेनेभा, भियना, बहराइन, बंगलादेश, बेल्जियम, क्यानडा, इजिप्ट, फ्रान्स, कुवेत, म्यानमार, पाकिस्तान, पोर्चुगल, थाइल्यान्ड र यूएईस्थित नेपाली नियोगमा राजदूत कार्यरत छन्।

नेपालमा राजदूत नियुक्ति गर्दा राजनीतिक क्षेत्र र परराष्ट्र सेवाका करिअर कूटनीतिज्ञ दुवैबाट उम्मेदवार छनोट गर्ने अभ्यास छ। सरकारले यसपटक पनि दुवै क्षेत्रबाट राजदूत नियुक्त गर्ने तयारी गरेको छ।