काठमाडौं। सुनसरीको देवानगन्जमा तनाव चर्किँदा प्रधानमन्त्री वालेन्द्र शाह(बालेन)कहाँ थिए ? नेपाली कम्युनिष्ट पार्टी(नेकपा)की सांसद बलावती शर्माले यही प्रश्नमार्फत सरकारको कार्यशैलीमाथि प्रश्न उठाएकी छन्।

प्रतिनिधिसभाको बैठकमा बोल्दै शर्माले देवानगन्जमा झडप भएको पाँच दिनपछि मात्रै प्रधानमन्त्री शाह राष्ट्रका नाममा सम्बोधन गर्दै टेलिभिजनको पर्दामा देखिएको टिप्पणी गरिन्।

उनले देशमा गम्भीर समस्या उत्पन्न भइरहँदा प्रधानमन्त्रीको प्रत्यक्ष उपस्थिति र सक्रियता नदेखिएको आरोप लगाइन्। सामाजिक सद्भावमा तनाव उत्पन्न हुँदा, सीमा क्षेत्रमा समस्या देखिँदा तथा विभिन्न वर्ग र समुदाय आफ्ना माग लिएर आन्दोलनमा रहँदा प्रधानमन्त्रीले उनीहरूसँग संवाद गर्नुपर्ने उनको भनाइ थियो।

शर्माले प्रधानमन्त्री सिंहदरबारको कोठाभित्र सीमित भएको आरोप लगाउँदै देशका नागरिक समस्यामा परेका बेला सरकार प्रमुखको भूमिका थप सक्रिय हुनुपर्ने बताइन्।

उनका अनुसार सीमा विवाद, सामाजिक तनाव, बेरोजगारी, आर्थिक समस्या तथा विभिन्न पीडित समूहका माग सम्बोधन गर्न प्रधानमन्त्री आफैंले पहल गर्नुपर्ने अवस्था छ। तर प्रधानमन्त्री राजनीतिक दलहरूसँग संवादमा नरहेको र नागरिकका समस्या सुन्न प्रत्यक्ष रूपमा नपुगेको शर्माको आरोप छ।

‘प्रधानमन्त्री सिंहदरबारको कोठाभित्र के गरेर बसिराख्नुभएको छ ?’ भन्दै शर्माले सरकारको प्राथमिकता र कार्यशैलीमाथि प्रश्न उठाइन्।

शर्माले प्रधानमन्त्री शाह राजनीतिक दलहरूसँग पर्याप्त संवादमा नरहेको आरोप लगाइन्। त्यस्तै, अन्तर्राष्ट्रिय कूटनीतिक सम्बन्ध सुधारका क्षेत्रमा पनि सरकारको प्रभावकारी सक्रियता नदेखिएको उनको भनाइ थियो।

संसद्लाई समेत सरकार प्रमुखले पर्याप्त महत्व नदिएको आरोप लगाउँदै उनले प्रधानमन्त्री जनप्रतिनिधिमूलक संस्थाप्रति उत्तरदायी हुनुपर्ने बताइन्।

उनले सुशासन र समृद्धिको नारासहित अघि बढेको सरकारले उद्योगी, व्यवसायी तथा निर्माण व्यवसायीलाई विश्वासमा लिनुको सट्टा त्रसित बनाउने काम गरेको आरोप लगाइन्।

निजी क्षेत्रलाई निरुत्साहित गरेर अर्थतन्त्र सुधार हुन नसक्ने भन्दै शर्माले सरकारको आर्थिक कार्यशैलीमाथि समेत प्रश्न उठाइन्।

शर्माले प्रधानमन्त्री शाहले संसद्को रोस्टमबाट नेपालले पनि भारतीय भूमि मिचेको भन्ने अभिव्यक्ति दिएको विषयलाई पनि पुनः उठाइन्।

उक्त अभिव्यक्ति दिएको दुई महिना दुई दिन बितिसक्दा पनि त्यसबारे प्रधानमन्त्रीले स्पष्ट जवाफ नदिएको र अभिव्यक्ति संसद्को रेकर्डबाट समेत नहटाइएको उनले बताइन्।

राष्ट्रियता र सीमा जस्तो संवेदनशील विषयमा प्रधानमन्त्रीको यस्तो अभिव्यक्ति सामान्य रूपमा लिन नसकिने शर्माको भनाइ छ।

उनले उक्त अभिव्यक्तिको जवाफ नआएसम्म र संसद्को अभिलेखबाट नहटाएसम्म विरोध जारी राख्ने बताइन्।

देवानगन्ज घटनापछि प्रधानमन्त्रीको सम्बोधन आए पनि त्यसअघि सरकारको सक्रियता किन देखिएन भन्ने प्रश्न शर्माले उठाएकी छन्।

उनको भनाइमा सरकार प्रमुखले संकट उत्पन्न भएपछि मात्रै सम्बोधन गर्ने होइन, सम्भावित तनाव पहिचान गरी समयमै संवाद र हस्तक्षेप गर्नुपर्ने हुन्छ।

सामाजिक सद्भाव, सीमा सुरक्षा, आर्थिक संकट र नागरिकका आन्दोलनजस्ता विषय एकपछि अर्को उठिरहेका बेला प्रधानमन्त्रीको नेतृत्व र सरकारको उपस्थितिमाथि नै प्रश्न उठ्नु गम्भीर राजनीतिक सन्देश भएको शर्माको टिप्पणी छ।