काठमाडौं। काठमाडौंको नयाँ बसपार्क क्षेत्रस्थित एउटा गेष्ट हाउसलाई आधार बनाएर लागुऔषध कारोबार गर्दै आएको आरोपमा प्रहरीले तीन जनालाई पक्राउ गरेको छ।

मधेस प्रदेशको सप्तरीबाट खैरो हेरोइन काठमाडौं ल्याएर बिक्री–वितरण गर्ने समूहका तीन जनालाई लागुऔषध नियन्त्रण ब्युरोले पक्राउ गरेको हो।

ब्युरोका प्रहरी उपरीक्षक दुर्गाराज रेग्मीका अनुसार पक्राउ पर्नेमा ओखलढुंगा घर भएका ३४ वर्षीय हितबहादुर बस्नेत, सप्तरीको राजगढ गाउँपालिका–७ का १९ वर्षीय रामकृष्ण शर्मा र धनुषाको जनकनन्दिनी गाउँपालिका–३ का २१ वर्षीय धनञ्जय पासवान छन्।

प्रहरीले उनीहरूको साथबाट ४३ ग्राम खैरो हेरोइन बरामद गरेको जनाएको छ।

प्रहरीको प्रारम्भिक अनुसन्धानअनुसार लागुऔषध सप्तरीबाट काठमाडौं ल्याउने क्रममा विभिन्न तरिका अपनाइएको खुलेको छ।

धनञ्जय पासवानले भुजाको बोरामा लुकाएर माइक्रोबसमार्फत लागुऔषध काठमाडौंसम्म ल्याउने गरेको अनुसन्धानबाट खुलेको प्रहरीले जनाएको छ। उनी आइटी इन्जिनियरिङ अध्ययनरत विद्यार्थी रहेको पनि प्रहरीले जानकारी दिएको छ।

काठमाडौं ल्याइएको लागुऔषध नयाँ बसपार्क क्षेत्रमा बसेर कारोबार गर्ने गरेको प्रहरीको भनाइ छ।

पक्राउ परेका हितबहादुर बस्नेत नयाँ बसपार्कस्थित गेष्ट हाउसमा बसेर खैरो हेरोइन बिक्री गर्ने गरेको प्रहरी अनुसन्धानबाट खुलेको छ।

बस्नेत स्कुल बस चालकका रूपमा समेत काम गर्दै आएको खुलेको प्रहरीले जनाएको छ।

यस्तै, रामकृष्ण शर्माले राइड सेयरिङ प्लेटफर्ममार्फत खैरो हेरोइन मगाएर खरिद गर्ने गरेको अनुसन्धानबाट खुलेको छ।

प्रहरीका अनुसार उनीहरूबीच पाँच पटकसम्म लागुऔषधको कारोबार भएको देखिएको छ। तर कारोबारमा संलग्न व्यक्ति र खरिदकर्ताबीच प्रत्यक्ष भेट भने भएको थिएन।

राइड सेयरिङ सेवाको प्रयोग गरेर लागुऔषध एक ठाउँबाट अर्को ठाउँमा पठाउने र रकमसमेत त्यही माध्यमबाट व्यवस्थापन गर्ने गरेको प्रहरीको दाबी छ।

यसरी प्रत्यक्ष सम्पर्क नगरी कारोबार गर्ने शैली अपनाएकाले उनीहरूको गतिविधि पहिचान गर्न चुनौती भएको प्रहरीको भनाइ छ।

प्रहरीले पक्राउ परेका तीनै जनामाथि थप अनुसन्धान अघि बढाएको जनाएको छ। अनुसन्धानका क्रममा कारोबारको सञ्जालमा अन्य व्यक्ति संलग्न भए–नभएको तथा लागुऔषधको स्रोत र वितरण सञ्जालबारे समेत थप विवरण खुल्ने अपेक्षा गरिएको छ।