काठमाडौं। प्रधानमन्त्री बालेन्द्र शाहले प्रतिनिधिसभामा दिएको सीमा विवादसम्बन्धी अभिव्यक्तिको स्पष्टीकरण माग गर्दै विपक्षी दलहरूले शुक्रबार पनि प्रतिनिधिसभाको बैठकमा विरोध जनाएका छन्।

सिंहदरबारस्थित संसद् भवनमा सभामुख डोलप्रसाद अर्यालले बैठक सुरु गर्नेबित्तिकै नेपाली कांग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी र राष्ट्रिय प्रजातन्त्र पार्टीका सांसदहरू आ–आफ्नो स्थानमा उठेर विरोध गरेका हुन्।

गत जेठ १७ गते प्रधानमन्त्री शाहले प्रतिनिधिसभामा सांसदहरूका प्रश्नको जवाफ दिने क्रममा भारतको भूमि नेपालले समेत मिचेको अभिव्यक्ति दिएका थिए। उक्त अभिव्यक्तिप्रति विपक्षी दलहरूले आपत्ति जनाउँदै त्यसबारे प्रधानमन्त्रीले संसद्मै स्पष्टीकरण दिनुपर्ने माग गर्दै आएका छन्।

तर, प्रधानमन्त्री शाहले अहिलेसम्म उक्त अभिव्यक्तिबारे संसद्मा स्पष्टीकरण दिएका छैनन्। साथै, अभिव्यक्ति संसद्को रेकर्डबाट हटाउन सभामुखले सचिवालयलाई निर्देशनसमेत दिएका छैनन्। यही विषयलाई लिएर विपक्षी दलहरूले निरन्तर बैठकमा विरोध गर्दै आएका छन्।

बैठक सुरु भएपछि सभामुख अर्यालले नेपाली कांग्रेसका सांसद डा. चन्द्रमोहन यादवलाई बोल्न समय दिएका थिए। यादवले पार्टीका तर्फबाट बोल्दै प्रधानमन्त्रीको सीमा विवादसम्बन्धी अभिव्यक्तिको विरोध जारी रहेको बताए।

‘सम्माननीय प्रधानमन्त्रीजीको सीमासँग सम्बन्धित विवादित र आपत्तिजनक अभिव्यक्तिको बारेमा हामीले विरोध गर्दै आएका छौं। त्यो यथावत् छ,’ उनले भने।

जेठ १७ गते प्रतिनिधिसभामा सांसदहरूका प्रश्नको जवाफ दिने क्रममा प्रधानमन्त्री शाहले भारतसँगको सीमा विवादका विषयमा दुईवटा विषय उठाएका थिए।

पहिलो, उनले लिपुलेक–लिम्पियाधुरासम्बन्धी विषयमा नेपाल सरकारले भारत सरकारलाई कूटनीतिक नोट पठाएको र त्यसको जवाफ प्राप्त भएको बताएका थिए। उनले यस विषयमा भारत र चीनसँगै बेलायत सरकारसँग पनि कुरा गरिएको बताएका थिए।

त्यस क्रममा उनले ब्रिटिस इन्डियाले छाडेर गएको सीमा विवादमा बेलायतले पनि सरोकार राख्नुपर्ने नेपालको धारणा रहेको बताएका थिए।

दोस्रो विषयमा प्रधानमन्त्री शाहले नेपालले पनि भारतको भूमि विभिन्न स्थानमा मिचेको दाबी गरेका थिए।

उनले दुवै देशले एकअर्काको भूमि मिचेको विषयमा अध्ययन गरी आपसी समझदारीका आधारमा समस्या समाधान गर्नुपर्ने धारणा राखेका थिए।

प्रधानमन्त्रीको यही अभिव्यक्तिप्रति विपक्षी दलहरूले आपत्ति जनाएका हुन्। विपक्षी सांसदहरूले प्रधानमन्त्रीले संसद्मा तथ्य र आधारसहित स्पष्टीकरण दिनुपर्ने माग गर्दै आएका छन्।

यसैबीच, धनुषाको ढल्केबरमा निर्माण गर्ने भनिएको ट्रमा सेन्टर सरकारले अन्यत्र सार्न खोजेको भन्दै नेपाली कांग्रेसका सांसद डा. चन्द्रमोहन यादवले सदनमा फरक शैलीमा विरोध जनाएका छन्।

प्रतिनिधिसभाको आकस्मिक समयमा बोल्दै यादवले स्वास्थ्य तथा जनसंख्यामन्त्री निशा मेहताले ढल्केबरको ट्रमा सेन्टर अन्यत्र सार्न खोजेको आरोप लगाए।

सरकारको उक्त निर्णयको विरोधमा आफू दिनभर सदनमा उठेर मौन बस्ने घोषणा उनले गरे।

‘ढल्केबरमा बन्ने भनिएको ट्रमा सेन्टर यो सरकारले सार्ने भनेको छ। यसको विरोधमा म आज दिनभर सदनमा उठेर मौन बस्छु,’ उनले भने।

यादवले यसअघि नै उक्त आयोजनाका लागि बजेट विनियोजन भइसकेको दाबी गरे। उनका अनुसार सुरुमा २० करोड रुपैयाँ र त्यसपछि थप २ करोड रुपैयाँ ट्रमा सेन्टरका लागि छुट्याइएको थियो।

बजेट विनियोजन भएर प्रक्रिया अघि बढिसकेको आयोजनालाई अन्यत्र सार्न खोज्नु उचित नभएको भन्दै उनले सरकारको निर्णयप्रति आपत्ति जनाएका छन्।

सभामुख अर्यालले पटक–पटक आसन ग्रहण गर्न आग्रह गरे पनि यादवले आफ्नो विरोध जारी राखेका थिए।

अन्तत : सभामुखले संसदलाई उक्त घटनाको सत्य सत्य के हो जानकारी गराउन निर्देशन दिएपछि उनि बसेका हुन्।