काठमाडौं । जापानको आइची–नागोया क्षेत्रमा आगामी सेप्टेम्बर १९ देखि अक्टोबर ४ सम्म आयोजना हुने २०औँ एसियन गेम्समा नेपालले २२ खेलमा सहभागिता जनाउने भएको छ।

एसियाली खेलकुदको सबैभन्दा ठूलो मञ्चमध्ये एक मानिने प्रतियोगितामा नेपालबाट १३६ खेलाडीले प्रतिस्पर्धा गर्ने भएका छन्।

राष्ट्रिय खेलकुद परिषद् (राखेप) का अनुसार नेपाली टोलीमा ८० पुरुष र ५६ महिला खेलाडी रहनेछन्। खेलाडीबाहेक प्रशिक्षक, व्यवस्थापक, मेडिकल टोली, नेपाल ओलम्पिक कमिटीका प्रतिनिधि तथा अन्य आवश्यक पदाधिकारीसहित नेपाली टोलीको कुल संख्या २१७ पुग्नेछ।

नेपालले आर्चरी, एथलेटिक्स, ब्याडमिन्टन, बक्सिङ, क्रिकेट, साइकलिङ, गल्फ, कबड्डी, कराते, जुडो, स्क्वास, पौडी, टेबलटेनिस, टेनिस, सफ्ट टेनिस, कुस्ती, क्यानोइ स्लालोम, ब्रेकिङ एन्ड डान्स स्पोर्ट्स, स्केटबोर्ड, तेक्वान्दो, भलिबल र उसुमा प्रतिस्पर्धा गर्नेछ।

यसपटक नेपालले टिम इभेन्टमा महिला तथा पुरुष कबड्डी, पुरुष क्रिकेट र महिला भलिबलमा सहभागिता जनाउनेछ। अन्य खेल व्यक्तिगत विधामा केन्द्रित छन्।

एसियन गेम्सका लागि तयार गरिएको नेपाली प्रतिनिधिमण्डलमा १३६ खेलाडीका अतिरिक्त ३२ प्रशिक्षक र २० व्यवस्थापक रहनेछन्। टोलीको नेतृत्वका लागि राखेप सदस्य–सचिव रामचरित्र मेहतालाई सेफ दि मिसनको जिम्मेवारी दिइएको छ।

नेपाल ओलम्पिक कमिटीका कोषाध्यक्ष तथा नेपाल गल्फ संघका अध्यक्ष टासी घले डेपुटी सेफ दि मिसनका रूपमा रहनेछन्।

टोलीमा मेडिकल टिम, नेपाल ओलम्पिक कमिटीका पदाधिकारी, सञ्चार टोलीलगायत अन्य सदस्यसमेत रहनेछन्। यसमध्ये १८८ जनाको नाम सार्वजनिक भइसकेको छ भने बाँकी २७ जनाको नाम सार्वजनिक हुन बाँकी रहेको राखेप स्रोतले जनाएको छ।

एसियन गेम्समा नेपालका खेलाडीलाई उच्चस्तरीय प्रतिस्पर्धाको अनुभव दिलाउनेसँगै अन्तर्राष्ट्रिय स्तरमा आफ्नो क्षमता प्रस्तुत गर्ने अवसर पनि हुनेछ। विभिन्न खेलका खेलाडीले आफ्नो तयारीअनुसार प्रदर्शन सुधार गर्ने लक्ष्य राखेका छन्।

खेलअनुसार सबैभन्दा ठूलो नेपाली टोली कबड्डीमा हुनेछ। पुरुष र महिला दुवै टोलीमा १२–१२ खेलाडी गरी कबड्डीमा कुल २४ खेलाडीले प्रतिस्पर्धा गर्नेछन्।

महिला कबड्डी टोलीमा रविना चौधरी, गंगा घिमिरे, नानु माया पराजुली, विनिता पन्डित क्षेत्री, जयन्ती बडु, अस्मा यादव, खिम माया खत्री, मेनुका कुमारी राजवंशी, मिना नेपाली, सृजना कुमारी थारु, मनमती विष्ट र मनिषा जोशी रहेका छन्।

पुरुष कबड्डी टोलीमा घनश्याम रोका मगर, अन्कु पुन, आदित चौधरी, प्रकाश गिरी, सुरज बोहरा, संस्कार कुमार, रवि थारु, अशोक जोशी, सागर थादव, कुमार लामा, गणेश पार्की र करुण रसाइली छन्।

कबड्डीपछि पुरुष क्रिकेटमा १५ र महिला भलिबलमा १२ खेलाडी सहभागी हुनेछन्।

पुरुष क्रिकेटमा नेपालले आफ्नो नियमित अन्तर्राष्ट्रिय टोलीका अधिकांश अनुभवी खेलाडीलाई समेटेको छ। टोलीमा रोहितकुमार पौडेल, दीपेन्द्रसिंह ऐरी, सोमपाल कामी, करण केसी, सन्दीप लामिछाने, आरिफ शेख, आसिफ शेख, कुशल भुर्तेल, ललित राजवंशी, गुल्सनकुमार झा, नन्दन यादव, लोकेश बम, सन्दीप जोरा, शेर मल्ल र कुशल मल्ल रहेका छन्।

नेपालका लागि क्रिकेट पछिल्लो समय अन्तर्राष्ट्रिय मञ्चमा तुलनात्मक रूपमा बलियो प्रदर्शन गर्ने खेल बनेकाले एसियन गेम्समा पनि टोलीबाट राम्रो नतिजाको अपेक्षा गरिएको छ।

भलिबलमा नेपालले महिला टोलीलाई मात्र सहभागी गराउने भएको छ। टोलीमा निरुता ठगुन्ना, उषा भण्डारी, मिना सुनार, सलिना बुढामगर, आरती सुवेदी, लक्ष्मी चन्द, बसन्ती कुमारी साउद, सुमित्रा रेग्मी, सुनिता खत्री, रिमा कुँवर, प्रगती नाथ र सलिना श्रेष्ठ रहेका छन्।

महिला भलिबलले पनि एसियाली स्तरमा आफ्नो क्षमता परीक्षण गर्नेछ। टिम गेममा प्रतिस्पर्धा गर्दा खेलाडीबीचको समन्वय, अनुभव र मानसिक तयारी महत्वपूर्ण हुने भएकाले प्रतियोगिताअघि प्रशिक्षणलाई विशेष प्राथमिकता दिइनेछ।

व्यक्तिगत विधातर्फ सबैभन्दा धेरै खेलाडी उसुमा छन्। उसुमा ११ खेलाडीले नेपालका लागि प्रतिस्पर्धा गर्नेछन्।

विजय सिन्जाली, हरिप्रसाद गोले, राजीव तामाङ, दीपक हमाल, सुस्मिता तामाङ, सविता राई, रोहित चुनारो, मुकेश पन्डित, अमर सुनार, सञ्जीव महर्जन र रिता ठकुल्ला टोलीमा छन्।

उसुमा विभिन्न विधा र तौल समूहमा नेपाली खेलाडीले चुनौती प्रस्तुत गर्नेछन्। यस खेलबाट पनि नेपालले राम्रो प्रदर्शनको अपेक्षा गरेको छ।

एथलेटिक्सतर्फ नेपालले मध्यम तथा लामो दूरीका दौडमा खेलाडी उतार्नेछ। सोमबहादुर कुमालले ८०० मिटरमा प्रतिस्पर्धा गर्नेछन्। मुकेशबहादुर पालले १५०० र ५००० मिटरमा सहभागिता जनाउनेछन्।

राजन रोकायले १० हजार मिटर तथा म्याराथनमा प्रतिस्पर्धा गर्नेछन् भने खड्कबहादुर खड्का म्याराथनमा सहभागी हुनेछन्।

महिलातर्फ सन्तोषी श्रेष्ठले ५००० र १० हजार मिटरमा प्रतिस्पर्धा गर्नेछिन्। पूर्णलक्ष्मी न्यौपानेले १५०० र ५००० मिटरमा नेपालको प्रतिनिधित्व गर्नेछिन्।

पौडीमा नेपालबाट पाँच खेलाडी सहभागी हुनेछन्। डुआना लामाले १०० मिटर फ्रिस्टाइल, २०० मिटर फ्रिस्टाइल र १०० मिटर ब्रेस्टस्ट्रोकमा प्रतिस्पर्धा गर्नेछिन्।

आर्या महर्जनले १०० मिटर फ्रिस्टाइल र ५० मिटर ब्याकस्ट्रोकमा प्रतिस्पर्धा गर्नेछिन्। पुरुषतर्फ अभिव प्रधानले १०० मिटर फ्रिस्टाइल र ५० मिटर बटरफ्लाई, जादेन श्रेष्ठले १०० र ५० मिटर ब्रेस्टस्ट्रोक तथा एर्भिन श्रेष्ठले ५० र १०० मिटर फ्रिस्टाइलमा प्रतिस्पर्धा गर्नेछन्।

बक्सिङमा नेपालले सात खेलाडी सहभागी गराउनेछ। महिलातर्फ रमिशा श्रेष्ठले ५१ केजी, अस्मिता दुलालले ५४ केजी र कुसुम तामाङले ६५ केजी तौल समूहमा प्रतिस्पर्धा गर्नेछन्।

पुरुषतर्फ चन्द्रबहादुर थापा ५५ केजी, खगेन्द्र रोका मगर ६० केजी, धनबहादुर दर्लामी ७० केजी र रबिन नेपाल ९० केजी तौल समूहमा प्रतिस्पर्धा गर्नेछन्।

जुडोमा पुरुषतर्फ विकास विक, विशेष विक र सुजन गुरुङ तथा महिलातर्फ निशा श्रेष्ठ, देवकी माया श्रेष्ठ र पुनम श्रेष्ठले प्रतिस्पर्धा गर्नेछन्।

करातेमा राकेश मानन्धर, मिनबहादुर तामाङ र तेन्जिङ शेर्पाले पुरुषतर्फ तथा निरुपा दोङ तामाङ, एरिका गुरुङ, सानु माया थिङ, एलिसा रास्कोटी मगर र मेघा लिम्बुले महिलातर्फ नेपालको प्रतिनिधित्व गर्नेछन्।

कुस्तीमा सुरेश चुनारा, निखिल राज पटेल, राज यादव र रामकिशोर यादव पुरुषतर्फ तथा सुशिला चन्द र सिवाङ्गी दुबे महिलातर्फ सहभागी हुनेछन्।

आर्चरीमा तिलक पुन मगर र ज्ञानु अवालेले नेपालको प्रतिनिधित्व गर्नेछन्। साइकलिङमा नवराज न्यौपाने र उषा खनाल सहभागी हुनेछन्।

गल्फमा सुवास तामाङ, सद्भाव आचार्य, राहुल विक र तारा कार्कीले प्रतिस्पर्धा गर्नेछन्। नेपालले गल्फमा पनि अन्तर्राष्ट्रिय अनुभव भएका खेलाडीलाई उतार्ने तयारी गरेको छ।

क्यानोइ स्लालोममा विजय माझी र आशिष रानामगर सहभागी हुनेछन्। दुवैले क्यानोइ तथा कायाक स्लालोमका विभिन्न विधामा प्रतिस्पर्धा गर्नेछन्।

टेबलटेनिसमा संयोग कपाली, रुबिन महर्जन, गनन्जय दाहाल, नविता श्रेष्ठ, एभाना थापा र योङ्गी पौडेल सहभागी हुनेछन्।

टेनिसतर्फ प्रदीप खड्का, निसान श्रेष्ठ, अभिषेक बास्तोला र शिवाली गुरुङले नेपालको प्रतिनिधित्व गर्नेछन्।

सफ्ट टेनिसमा जर्जिया चौधरी, कमलबहादुर भण्डारी, प्रदीप खत्री र ब्रिजेश पाण्डे सहभागी हुनेछन्।

स्क्वासतर्फ अरहान्त केश सिम्ह र विपना ब्लोनले नेपालको प्रतिनिधित्व गर्नेछन्। दुवैले सिंगल्ससँगै मिक्स डबल्समा पनि प्रतिस्पर्धा गर्नेछन्।

तेक्वान्दोमा अभिषेक बरालले ८० केजीमुनिको विधामा प्रतिस्पर्धा गर्नेछन्। युवराज राना र स्वस्तिका तामाङले पुम्से विधामा नेपालको प्रतिनिधित्व गर्नेछन्।

स्केटबोर्डमा गजेन्द्र बर्देवा र शरदकुमार राई सहभागी हुनेछन्। ब्रेकिङ एन्ड डान्स स्पोर्ट्समा सुनिल बम्जनले नेपालको प्रतिनिधित्व गर्नेछन्।

एसियन गेम्समा विश्वका बलिया खेलाडी तथा टोलीसँग प्रतिस्पर्धा गर्नुपर्ने भएकाले नेपाली खेलाडीका लागि प्रतियोगिता सहज हुने छैन। यद्यपि पछिल्लो समय विभिन्न खेलमा नेपाली खेलाडीको अन्तर्राष्ट्रिय उपस्थिति बढ्दै गएको छ।

नेपालका लागि टिम गेममा राम्रो प्रदर्शन गर्नुका साथै व्यक्तिगत खेलमा आफ्नो व्यक्तिगत र राष्ट्रिय प्रदर्शन सुधार गर्नु पनि महत्वपूर्ण लक्ष्य हुनेछ। पदक जित्ने लक्ष्यसँगै एसियाली स्तरमा प्रतिस्पर्धात्मक अनुभव हासिल गर्नु नेपाली टोलीका लागि अर्को महत्वपूर्ण उपलब्धि हुनसक्नेछ।

प्रतियोगितामा सहभागी हुने खेलाडीको तयारी, प्रशिक्षण, व्यवस्थापन र आवश्यक पूर्वाधारलाई प्रभावकारी बनाउने चुनौती सम्बन्धित निकायसामु छ। ठूलो संख्यामा खेलाडी सहभागी गराउनु मात्र पर्याप्त नहुने भएकाले प्रतियोगिताअघि उनीहरूको तयारीको स्तर, खेल सामग्री, अन्तर्राष्ट्रिय अनुभव र मानसिक तयारीलाई समेत प्राथमिकता दिनुपर्ने देखिन्छ।

२०औँ एसियन गेम्समा नेपालको सहभागिता खेलाडीको संख्या र खेलको विविधताका हिसाबले महत्वपूर्ण रहनेछ। अब नेपाली खेलाडीले जापानको प्रतिस्पर्धात्मक मैदानमा आफ्नो तयारीलाई प्रदर्शनमा बदल्दै देशका लागि सम्झनलायक नतिजा निकाल्नुपर्ने चुनौती सामना गर्नेछन्।