काठमाडौं। राष्ट्रिय स्वतन्त्र पार्टी (रास्वपा)का संसदीय दलका नेता ज्ञानेन्द्र शाहीले आफूविरुद्ध सामाजिक सञ्जाल तथा विभिन्न माध्यमबाट भ्रमपूर्ण प्रचार भइरहेको भन्दै आपत्ति जनाएका छन्। प्रतिनिधिसभाको बैठकमा बोल्दै शाहीले आफू संसद्मा आफैँलाई ‘अग्निपरीक्षा’ दिन उभिएको बताएका हुन्।

शाहीले आफूले मदिरा सेवन गरेको तथा अश्लील भिडियोसँग जोडेर विभिन्न आरोप लगाइएको भन्दै ती आरोप प्रमाणित गर्न चुनौती दिए। उनले आफूविरुद्ध लगाइएका आरोपको सत्यता जाँच गर्न संसद्मै आफ्नो स्वास्थ्य परीक्षण गर्नुपर्ने मागसमेत गरे।

प्रतिनिधिसभा बैठकमा उनले नेपालका प्रथम प्रधानमन्त्री भीमसेन थापाको प्रसङ्ग उल्लेख गर्दै गलत र भ्रामक सूचनाले व्यक्तिको जीवनमा गम्भीर असर पार्न सक्ने बताए।

‘नेपालका प्रथम प्रधानमन्त्री भीमसेन थापाले गलत र भ्रामक सूचनाका कारण पीडादायी घाँटी रेटिएर आत्महत्या गरेको इतिहास नेपाली राजनीतिमा जीवितै छ। आज त्यस्तै अवस्था ममाथि आइपरेको छ,’ उनले भने।

आफूविरुद्ध सामाजिक सञ्जालमा विभिन्न किसिमका आरोप लगाइएको उल्लेख गर्दै शाहीले ‘खाइ न पाइ छालाको टोपी लाई’ भन्ने उखान चरितार्थ भएको बताए। आफूले रक्सी सेवन गरेर जथाभावी बोलेको तथा अश्लील भिडियो सार्वजनिक भएको भन्दै आरोप लगाइएको उनको भनाइ थियो।

‘आज ममाथि रक्सी खाएर जे मन लाग्यो त्यही बोल्यो, अश्लील भिडियोहरू आए भन्ने आरोप लगाइएका छन्,’ उनले भने।

आफूमाथि लगाइएका आरोप प्रमाणित गर्न चुनौती दिँदै शाहीले संसद्मै आफ्नो स्वास्थ्य परीक्षण गर्न माग गरे। उनले संसद्मा स्वास्थ्य विभाग तथा स्वास्थ्यकर्मीको टोली रहेको उल्लेख गर्दै चिकित्सकको टोलीमार्फत आफ्नो शरीरको विस्तृत परीक्षण गर्न आग्रह गरे।

‘यही संसद्मा स्वास्थ्य विभाग छ, स्वास्थ्यकर्मीसहितको टोली छ र टोली राखियोस्। चिकित्सकको टोलीबाट मेरो शरीरको प्रत्येक अंग जाँच गरियोस्। मेरो रगतदेखि छालासम्म परीक्षण गरियोस्,’ उनले भने।

उनले जन्मेदेखि अहिलेसम्म आफूले मदिरा सेवन गरेको प्रमाणित भए सांसद पदबाट राजीनामा दिने घोषणा पनि गरे।

‘जन्मदेखि अहिलेसम्म मदिराको एक थोपा मात्रै मेरो शरीरमा कतै प्रयोग भएको र कतै देखियो भने म सांसद पदबाट राजीनामा दिन तयार छु। म राजीनामा दिन तयार छु,’ उनले भने।

शाहीले आफूविरुद्ध अश्लील भिडियोसँग जोडेर भइरहेको प्रचारप्रति पनि गम्भीर आपत्ति जनाए। सामाजिक सञ्जालमा भेटिएका अन्य व्यक्तिका भिडियो आफूलाई जोडेर प्रचार गरिएको उनको आरोप थियो।

‘सामाजिक सञ्जालमा कतै भेटिएको कुनै अमुक अर्कै व्यक्तिको अश्लील भिडियो, यौन अश्लील भिडियो ल्याएर यो ज्ञानेन्द्र शाही हो भन्दै प्रचार गरिएको छ,’ उनले भने।

यदि उक्त भिडियो आफू नै भएको प्रमाणित भए राजनीतिक जीवनबाटै सन्यास लिने उनले घोषणा गरे। उनले भिडियोको सत्यता परीक्षण गर्न सम्बन्धित निकायलाई चुनौतीसमेत दिए।

‘उक्त भिडियो यदि मेरो हो भने जाँच गरियोस्, म राजनीतिक जीवनबाट सन्यास लिन्छु,’ शाहीले भने।

आफूविरुद्ध भ्रमपूर्ण सूचना फैलाउने व्यक्तिहरूको समेत स्वास्थ्य परीक्षण गर्नुपर्ने माग उनले गरे। आफूलाई बदनाम गर्ने उद्देश्यले गलत सूचना तथा सामग्री फैलाइएको भन्दै उनले त्यसको स्रोत र सत्यताबारे छानबिन हुनुपर्ने बताए।

शाहीले सामाजिक सञ्जालमा चरित्रहत्या गर्ने उद्देश्यले गलत सूचना फैलाउनेहरूमाथि कारबाही गर्न सरकारसँग माग गरेका छन्। विशेषगरी गृहमन्त्रीसँग आफूविरुद्ध भ्रम फैलाउने व्यक्तिहरूको पहिचान गरी कानुनी कारबाही गर्न उनले आग्रह गरे।

उनले राजनीतिक व्यक्तिको चरित्रमाथि गम्भीर आरोप लगाउँदा त्यसको प्रमाण र तथ्य प्रस्तुत गर्नुपर्ने भन्दै प्रमाणबिनाका आरोपले व्यक्तिको मात्र नभई समग्र राजनीतिक वातावरणमा समेत नकारात्मक असर पार्ने बताए।

शाहीले आफूले संसद्को रोस्टमबाटै आरोपको सामना गर्न तयार रहेको उल्लेख गर्दै सत्य र तथ्यका आधारमा आफ्नो विषय टुंग्याउन आग्रह गरे। उनले आफूविरुद्ध फैलाइएका सामग्रीको निष्पक्ष परीक्षण र अनुसन्धान भए आफू जुनसुकै परिणाम स्वीकार गर्न तयार रहेको पनि बताएका छन्।