काठमाडौं। पश्चिमी कोलम्बियामा सोमबार गएको शक्तिशाली भूकम्पमा परी मृत्यु हुनेको संख्या २६५ पुगेको छ। भग्नावशेषमा फसेकाहरूको खोजी जारी रहे पनि करिब ५०० जना अझै बेपत्ता रहेको अधिकारीहरूले बताएका छन्।

७.४ म्याग्निच्युडको भूकम्पले काली, पेरेरा र मनिजालेसलगायत सहरमा ठूलो क्षति पुर्‍याएको छ। भूकम्पपछि लगातार परकम्प गइरहेकाले उद्धार तथा खोजीमा कठिनाइ भइरहेको छ।

कोलम्बियाका राष्ट्रपति अबेलार्डो डे ला एस्प्रियेलाले क्षतिग्रस्त घर, अस्पताल, विद्यालय तथा अन्य पूर्वाधार पुनर्निर्माणका लागि आपतकालीन कोष स्थापना गर्ने घोषणा गरेका छन्। उनले भूकम्पबाट भएको क्षति सम्बोधन गर्न आर्थिक आपतकालसमेत घोषणा गरेका छन्।

सरकारी विवरणअनुसार भूकम्पबाट २५ हजार ८०० भन्दा बढी परिवार प्रभावित भएका छन्। तीन हजार ७७० जना घाइते भएका छन् भने नौ हजार ५५० भन्दा बढी घरमा क्षति पुगेको छ।

प्रमुख कफी उत्पादन क्षेत्रको सहर पेरेरामा ८३ जना र देशको तेस्रो ठूलो सहर कालीमा ७४ जनाको मृत्यु भएको पुष्टि भएको छ। दुर्गम चोको क्षेत्रका बस्तीसमेत प्रभावित भएका छन्।

कोलम्बियाको भूगर्भीय सर्वेक्षणका अनुसार मुख्य भूकम्पपछि १३० वटा परकम्प रेकर्ड भइसकेका छन्। क्षतिग्रस्त संरचना थप भत्किन सक्ने जोखिमका कारण उद्धार टोलीले सावधानीपूर्वक खोजी गरिरहेका छन्।

सरकारले अहिले बेपत्ताको खोजी, घाइतेको उपचार, प्रभावित परिवारलाई राहत तथा ध्वस्त पूर्वाधार पुनर्निर्माणलाई प्राथमिकतामा राखेको जनाएको छ।