काठमाडौं । दक्षिणी फिलिपिन्सको जाम्बोआङ्गा सहरस्थित एक निजी विद्यालयमा मंगलबार गोली चल्दा दुई जनाको मृत्यु भएको छ। घटनामा कक्षा १० का एक विद्यार्थीको मृत्यु भएको पुष्टि भएको छ भने विद्यालयले मृतकको संख्या दुई रहेको जनाएको छ।

प्रहरीका अनुसार कक्षा ९ का एक विद्यार्थीले विद्यालय परिसरमा पिस्तोल र राइफल लिएर प्रवेश गरी कक्षाकोठामा गोली चलाएका थिए। त्यसपछि उनले आफैंलाई समेत गोली हानेको बताइएको छ।

घटना जाम्बोआङ्गास्थित क्याथोलिक संस्था एटिनो डे जाम्बोआङ्गा विश्वविद्यालयमा भएको हो। गोली चलेपछि विद्यालयमा रहेका विद्यार्थी र कर्मचारीबीच भागदौड मच्चिएको थियो।

स्थानीय सञ्चारमाध्यममा सार्वजनिक भएको भिडियोमा बन्दुक बोकेको व्यक्तिले विद्यालयको गल्ली हुँदै कक्षातर्फ अघि बढेर गोली चलाएको देखिएको बताइएको छ। घटनापछि विद्यार्थीहरू सुरक्षित स्थानतर्फ भागेका थिए।

प्रहरीले घटनाको उद्देश्यबारे अनुसन्धान गरिरहेको जनाएको छ। घटनास्थलबाट प्रमाण संकलन गर्नुका साथै अन्य पक्षबारे समेत अनुसन्धान भइरहेको छ। घाइतेको संख्या भने तत्काल स्पष्ट हुन सकेको छैन।

विद्यालयले विज्ञप्ति जारी गर्दै विद्यार्थी तथा कर्मचारीको सुरक्षा सुनिश्चित गरिएको र अभिभावकसँग समन्वय गरी विद्यार्थीलाई सुरक्षित रूपमा जिम्मा लगाउने व्यवस्था गरिएको जनाएको छ।

फिलिपिन्समा विद्यालयभित्र हुने गोलीकाण्ड दुर्लभ मानिए पनि पछिल्ला महिनामा यस्ता घटना दोहोरिएका छन्। यसअघि जुनमा मध्य फिलिपिन्समा भएको गोलीकाण्डमा तीन किशोरको मृत्यु भएको थियो भने २० जना घाइते भएका थिए।

घटनापछि विद्यालयको सुरक्षा व्यवस्थामाथि समेत प्रश्न उठेको छ। विशेषगरी उक्त विद्यालयले केही समयअघि सम्भावित विद्यालय गोलीकाण्डबाट जोगिन बन्दुकधारीसम्बन्धी सुरक्षा अभ्यास सञ्चालन गरेको थियो।