काठमाडौं। देशभर ग्यासको अभाव भइरहेका बेला बाजुरामा पनि खाना पकाउने एलपी ग्यासको अभाव भएको छ।

सदरमुकाम मार्तडीसहित कोल्टी, पिलुचौर र बाम्कालगायत क्षेत्रमा उपभोक्ताले समस्या भोगिरहेका छन्।

ग्यास लिन दैनिक बिक्री केन्द्र धाउनुपरे पनि रित्तो फर्किनुपर्ने अवस्था रहेको स्थानीय पवित्रा बोहराले बताइन्। ग्यास नपाउँदा उपभोक्ता दाउरा तथा अन्य वैकल्पिक इन्धन प्रयोग गर्न बाध्य भएका छन्। विशेषगरी डेरामा बस्ने विद्यार्थी र कर्मचारी बढी प्रभावित भएका छन्।

मार्तडी क्षेत्रमा मात्रै मासिक १० हजारभन्दा बढी सिलिन्डर ग्यासको माग रहेको व्यवसायी बताउँछन्। रेडियन्ट, मनकामना, भेरी र साइपाल कम्पनीका ग्यास बिक्री हुँदै आए पनि पछिल्लो एक सातादेखि अभाव चर्किएको हो।

व्यवसायी प्रकाश थापाका अनुसार भेरी र मनकामना ग्यास कम्पनीबाट पर्याप्त आपूर्ति हुन सकेको छैन। धनगढीस्थित रेडियन्ट ग्यास कम्पनीमा खाली सिलिन्डर पठाइएको र आइतबारसम्म आपूर्ति हुने अपेक्षा गरिएको उनले बताए।

प्रमुख जिल्ला अधिकारी डोरेन्द्र निरौलाले ग्यास अभाव समाधानका लागि अन्य जिल्लाका प्रशासनसँग समन्वय भइरहेको बताए। बाँकेका प्रमुख जिल्ला अधिकारीसँग भेरी ग्यास उपलब्ध गराउन आग्रह गरिएको उनको भनाइ छ।

उद्योग वाणिज्य संघ बाजुराका अध्यक्ष चक्र रोकायाले सडक तथा ढुवानी समस्याका कारण पनि ग्यास आपूर्तिमा कठिनाइ हुने गरेको बताए।

उनले कालोबजारी रोक्न जिल्लाको माग, मौज्दात र आपूर्तिको नियमित अनुगमन गरी उपभोक्तालाई सहज रूपमा ग्यास उपलब्ध गराउनुपर्नेमा जोड दिए।