काठमाडौं। गृहमन्त्री सुधन गुरुङले केही दिनअघि आफ्नो निर्वाचन क्षेत्र गोरखा-१ का मतदातालाई ‘भोट फिर्ता लैजानुस्’ भनेर दिएको अभिव्यक्ति गम्भीर राजनीतिक टिप्पणी नभई ठट्टाका रूपमा गरिएको बताएका छन्।

बुधबार राष्ट्रिय स्वतन्त्र पार्टीका सभापति रवि लामिछानेले बोलाएको पार्टी बैठकमा सहभागी भएर बाहिरिने क्रममा सञ्चारकर्मीले उक्त अभिव्यक्तिबारे प्रश्न गरेपछि गुरुङले आफूले मतदातासँग मजाक गरेको स्पष्टीकरण दिएका हुन्।

सञ्चारकर्मीको प्रश्नमा उनले आफ्ना मतदातासँग ठट्टा गर्न नहुने हो र भन्दै प्रतिप्रश्नसमेत गरे। उनले भने, ‘आफ्नो भोटरसँग जोक गर्न हुँदैन त ?’

गुरुङको उक्त अभिव्यक्तिलाई लिएर सामाजिक सञ्जाल तथा राजनीतिक वृत्तमा विभिन्न टिप्पणी भइरहेका बेला उनले आफ्नो भनाइलाई सामान्य ठट्टाका रूपमा व्याख्या गरेका हुन्।

निर्वाचन क्षेत्रका मतदाताले दिएको मतकै आधारमा आफू जनप्रतिनिधिका रूपमा निर्वाचित भएको अवस्थामा ‘भोट फिर्ता लैजानुस्’ भन्ने अभिव्यक्ति दिएको भन्दै उनको आलोचना भएको थियो। त्यसपछि उनले सार्वजनिक रूपमा आफ्नो भनाइको आशय स्पष्ट पारेका हुन्।

बुधबारको पार्टी बैठकमा सहभागी भएर बाहिरिने क्रममा सञ्चारकर्मीसँग छोटो प्रतिक्रिया दिँदै उनले आफूले मतदातालाई गम्भीर रूपमा अपमान गर्न खोजेको नभई रमाइलोका क्रममा उक्त अभिव्यक्ति दिएको दाबी गरे।