काठमाडौं। प्रमुख प्रतिपक्षी नेकपा एमालेले प्रधानमन्त्री वालेन्द्र शाह (बालेन) नेतृत्वको सरकारको कार्यशैलीप्रति कडा आपत्ति जनाएको छ।

एमाले संसदीय दलका नेता रामबहादुर थापा ‘बादल’ले वर्तमान सरकारको शासनशैलीलाई ‘बालेन्द्रतन्त्र’ को संज्ञा दिँदै मुलुकमा राष्ट्रियता, लोकतन्त्र र जनजीविकाका सवालमा गम्भीर सङ्कट उत्पन्न भएको दाबी गरेका छन्।

बुधबार प्रतिनिधिसभाको बैठकमा बोल्दै बादलले नेपालको लोकतान्त्रिक इतिहासकै कठिन परिस्थितिमध्ये अहिलेको अवस्था रहेको टिप्पणी गरे। उनले प्रधानमन्त्री शाह नेतृत्वको सरकार लोकतान्त्रिक मूल्य र मान्यताभन्दा बाहिर गएर अधिनायकवादतर्फ उन्मुख भएको आरोप लगाए।

‘२०१७ सालमा महेन्द्रतन्त्र र २०६१ सालमा ज्ञानेन्द्रतन्त्र आएजस्तै अहिले मुलुकमा बालेन्द्रतन्त्र स्थापित भएको छ,’ बादलले भने।

उनले सरकारका पछिल्ला गतिविधिले लोकतान्त्रिक संस्था, संवैधानिक व्यवस्था र जनताका अधिकारमाथि प्रश्न उठ्ने अवस्था सिर्जना गरेको बताए। सरकारको कार्यशैलीप्रति असन्तुष्टि जनाउँदै उनले प्रधानमन्त्री शाहले सत्ताको अभ्यासलाई संस्थागत प्रक्रियाभन्दा व्यक्तिगत निर्णयतर्फ केन्द्रित गरेको आरोप लगाए।

बादलले नेपालको राष्ट्रियतामाथि विभिन्न कोणबाट प्रहार भइरहेको दाबी गर्दै प्रधानमन्त्री शाहले जेठ १७ गते प्रतिनिधिसभामा दिएको अभिव्यक्तिमाथि समेत प्रश्न उठाए।

प्रधानमन्त्रीले नेपालले पनि भारतको भूमि मिचेको भन्ने आशयको अभिव्यक्ति दिएको उल्लेख गर्दै बादलले त्यसलाई ‘राष्ट्रविरोधी र गैरजिम्मेवार अभिव्यक्ति’को संज्ञा दिए।

‘त्यस दिन सदनमा प्रधानमन्त्रीले अस्वाभाविक र राष्ट्रविरोधी अभिव्यक्ति दिनुभयो,’ उनले भने, ‘नेपालले पनि भारतको भूमि मिचेको छ भन्नु गैरजिम्मेवारपनको पराकाष्ठा हो।’

नेपालको सीमा, राष्ट्रिय हित र सार्वभौमसत्तासँग जोडिएका विषयमा प्रधानमन्त्रीबाट आउने अभिव्यक्ति संवेदनशील र जिम्मेवार हुनुपर्ने उनको भनाइ थियो। प्रधानमन्त्रीको उक्त अभिव्यक्तिले नेपालको राष्ट्रिय अडान कमजोर पार्ने काम गरेको बादलको आरोप छ।

एमाले नेता बादलले सत्तारूढ राष्ट्रिय स्वतन्त्र पार्टी (रास्वपा)भित्र देखिएको आन्तरिक शक्ति संघर्षलाई राष्ट्रिय सुरक्षासँग जोडेर प्रश्न उठाए।

रास्वपा सभापति रवि लामिछानेको भारत भ्रमण र त्यसपछि प्रधानमन्त्री शाहको संसद्मा भएको आकस्मिक उपस्थितिबीच सम्बन्ध रहेको हुनसक्ने आशंका उनले व्यक्त गरे।

उनले भने, ‘एकातिर भारतमा रास्वपा सभापतिले भव्य स्वागत पाउनु र अर्कोतिर नेपालमा प्रधानमन्त्रीले आफ्नै भूमि मिचिएको स्वीकार्नु रहस्यमय छ।’

बादलले यी घटनाक्रमलाई सामान्य राजनीतिक गतिविधिका रूपमा मात्रै हेर्न नहुने भन्दै यसको पछाडि कुनै भू-राजनीतिक चलखेल छ कि छैन भन्ने प्रश्न उठाए।

उनले थपे, ‘कतै नेपाल सिक्किमीकरणको प्रक्रियामा त छैन ? यसले गम्भीर संशय पैदा गरेको छ।’

बादलले सरकारका पछिल्ला गतिविधिले नेपालको राष्ट्रिय अखण्डता, सार्वभौमसत्ता र राष्ट्रिय स्वाधीनतामाथि प्रश्न उठाउने अवस्था सिर्जना गरेको बताए।

उनले मुलुकको आन्तरिक राजनीतिक विवादलाई बाह्य शक्तिको प्रभावसँग जोडेर हेर्नुपर्ने अवस्था आएको दाबी गर्दै राष्ट्रिय हितका विषयमा सबै राजनीतिक दल र नागरिक सचेत हुनुपर्नेमा जोड दिए।

सरकारको विदेश नीति, राष्ट्रिय सुरक्षा नीति तथा छिमेकी मुलुकसँगको सम्बन्ध सञ्चालनमा विशेष सतर्कता अपनाउनुपर्ने उनको भनाइ थियो।