काठमाडौं। श्रम संस्कृति पार्टीका अध्यक्ष हर्क साम्पाङले राष्ट्रिय स्वतन्त्र पार्टी (रास्वपा) का सभापति रवि लामिछानेलाई तत्काल सरकारको नेतृत्व सम्हाल्न सुझाव दिएका छन्।

उनले रास्वपाका वरिष्ठ नेता बालेन्द्र शाह ‘बालेन’ नेतृत्वको वर्तमान सरकारबाट देशले गति लिन नसक्ने दाबी गरेका छन्।

साम्पाङले लामिछानेलाई नै सरकारको नेतृत्वमा आउन आग्रह गर्दै ढिला नगरी कदम चाल्न सुझाव दिएका हुन्। उनले सामाजिक सञ्जालमार्फत भनेका छन्, ‘तुरुन्तै ढिलो नगरी सरकार सम्हाल्नुपर्छ। यो सरकार रहिरहने हो भने न सुशासन हुन्छ, न विकास!’

सरकारले जनताको आधारभूत आवश्यकतासमेत पूरा गर्न नसकेको भन्दै साम्पाङले वर्तमान सरकारको कार्यशैलीप्रति असन्तुष्टि जनाएका छन्। विशेषगरी खाना पकाउने ग्याससमेत सहज रूपमा उपलब्ध गराउन नसकेको सरकारबाट सुशासन र विकासको अपेक्षा गर्नु कठिन हुने उनको भनाइ छ।

साम्पाङको यस्तो अभिव्यक्तिले रास्वपाभित्रकै दुई शीर्ष नेताबीचको शक्ति समीकरण र संघर्षले राजनीतिक वृत्तमा चर्चा र चासो हुँदै आएको छ।