काठमाडौं। राष्ट्रिय आविष्कार केन्द्रका संस्थापक, म्याग्दीबाट निर्वाचित सांसद तथा बहालवाला नवप्रवर्तनमन्त्री महावीर पुनको राजनीतिक यात्राबारे गम्भीर दाबी सार्वजनिक भएको छ ।

नेपाल कम्युनिष्ट पार्टीका म्याग्दी इन्चार्ज गोविन्द पौडेलले पत्रकार राजेन्द्र बानियाँसँगको कुराकानीमा पुनको चुनावी उम्मेदवारी राजनीतिक रहर वा पूर्वयोजनाअनुसार नभएको दाबी गरेका छन् ।

उनका अनुसार पुनलाई एउटा बाध्यात्मक परिस्थितिका कारण चुनावी मैदानमा आउनुपरेको थियो ।

पौडेलले पुन चुनावमा नउठेको भए उनको ज्यानमै जोखिम उत्पन्न हुनसक्ने अवस्था रहेको दाबी गरेका छन् ।

‘महावीर पुन चुनावमा उठाइएका हुन् । उनी चुनाव नउठेको भए ज्यानको खतरा थियो, उनलाई बाध्यात्मक अवस्था आइलागेको हो,’ पौडेलले भनेका छन् ।

पौडेलको यो भनाइसँगै विज्ञान, प्रविधि र नवप्रवर्तनको क्षेत्रमा लामो समय काम गरेका पुन राजनीतिमा कसरी आए भन्ने प्रश्न फेरि चर्चामा आएको छ ।

महावीर पुनको सार्वजनिक पहिचान राजनीतिभन्दा विज्ञान, प्रविधि र अनुसन्धानसँग जोडिएको छ । राष्ट्रिय आविष्कार केन्द्र स्थापना गरेर स्वदेशमै अनुसन्धान र आविष्कारको वातावरण बनाउन उनले लामो समय अभियान चलाएका थिए ।

यस्तो पृष्ठभूमिका व्यक्ति चुनावी राजनीतिमा आउनुलाई त्यतिबेला पनि चासोका साथ हेरिएको थियो । तर उनको उम्मेदवारीको पछाडि ‘ज्यानकै खतरा’ जोडिएको पौडेलको दाबीले राजनीतिक प्रवेशको पृष्ठभूमिमाथि थप प्रश्न खडा गरेको छ ।

यदि पौडेलको दाबीलाई आधार मान्ने हो भने पुनको राजनीतिक यात्रा व्यक्तिगत महत्वाकांक्षाभन्दा पनि कुनै विशेष परिस्थितिको परिणाम थियो भन्ने देखिन्छ । तर त्यस्तो परिस्थिति के थियो भन्ने विषयमा पौडेलले स्पष्ट विवरण भने दिएका छैनन् ।

पौडेलले पुनको ज्यान जोखिममा पर्नसक्ने अवस्था रहेको बताए पनि त्यो खतरा कसबाट थियो, किन उत्पन्न भयो र चुनावमा उम्मेदवार बनेपछि कसरी त्यो जोखिम कम भयो भन्ने खुलाएका छैनन् ।

त्यसैगरी पुनलाई चुनाव लड्न कसले दबाब दियो वा कुन घटनाक्रमका कारण यस्तो बाध्यात्मक अवस्था सिर्जना भयो भन्ने विषय पनि सार्वजनिक भएको छैन ।

त्यसैले पौडेलको भनाइ अहिले एउटा राजनीतिक दाबीका रूपमा मात्र आएको छ। यसबारे पुन स्वयं वा सम्बन्धित अन्य पक्षबाट थप स्पष्ट धारणा सार्वजनिक हुन बाँकी छ ।

पुनको राजनीतिक यात्रा सामान्य नेताको जस्तो परम्परागत बाटोबाट भएको थिएन । लामो समय विज्ञान तथा प्रविधिको क्षेत्रमा सक्रिय रहेका उनी अनुसन्धान, आविष्कार र स्वदेशी प्रविधिको विकासलाई प्राथमिकतामा राख्दै आएका व्यक्ति हुन् ।

राष्ट्रिय आविष्कार केन्द्रमार्फत उनले युवालाई अनुसन्धानतर्फ आकर्षित गर्ने, स्थानीय आवश्यकता सम्बोधन गर्ने प्रविधि विकास गर्ने तथा नेपालमै आविष्कारको वातावरण निर्माण गर्ने प्रयास गर्दै आएका छन् ।

यही पृष्ठभूमिबाट उनी निर्वाचनमा उम्मेदवार बनेर संसद्मा पुगे । त्यसपछि सरकारमा समेत सहभागी भई नवप्रवर्तनसँग सम्बन्धित जिम्मेवारी सम्हालिरहेका छन्।