प्रतिनिधिसभाको बैठकमा बोल्दै आचार्यले घटनापछि मृतकका परिवार तथा अभियुक्तसँग सम्बन्धित भिडिओहरू सामाजिक सञ्जालमा सार्वजनिक गरिएकोप्रति आपत्ति जनाएका हुन्।

उनले संवेदनशील आपराधिक घटनामा पीडित परिवारको गोपनीयता, सम्मान र मनोवैज्ञानिक अवस्थालाई ध्यान दिनुपर्ने बताए।

घटनाको अनुसन्धान र न्यायिक प्रक्रियालाई प्रभावित पार्ने गरी सम्बन्धित व्यक्तिका भनाइ तथा भिडिओ सार्वजनिक गर्नु उचित नभएको उनको भनाइ थियो।

आचार्यले मृतकका परिवारसँग सम्बन्धित भिडिओ सरकारी निकायमै खिचेर सार्वजनिक हुने र अभियुक्तले मेडिकल परीक्षणका क्रममा बोलेका विषयसमेत सामाजिक सञ्जालमार्फत सार्वजनिक हुने अवस्थाप्रति असन्तुष्टि जनाए।

‘मृतकको बुवाआमाले धन्यवाद भनेको भिडिओ मन्त्रालयमा खिचिन्छ र कतै मेडिकल गर्दै गर्दा अभियुक्तले बोलेका कुराहरूलाई सार्वजनिक तरिकाले पब्लिकमा राखिन्छ,’ उनले भने, ‘यस्तो समाज बन्द गरिनुपर्छ।’

आचार्यले घटनालाई केवल अपराध र अनुसन्धानको विषयका रूपमा मात्र नहेरी त्यससँग जोडिएका सामाजिक र मानवीय पक्षप्रति समेत संवेदनशील हुनुपर्नेमा जोड दिए।

उनले यस्ता घटनामा पीडित परिवारको दुःखलाई प्रचारको सामग्री बनाउने, अभियुक्तका अभिव्यक्तिलाई सनसनीपूर्ण रूपमा सार्वजनिक गर्ने तथा सामाजिक सञ्जालमा अपूर्ण सूचना फैलाउने प्रवृत्तिले समाजलाई थप असंवेदनशील बनाउँदै गएको बताए।

‘हामीले कस्तो समाज बनाइरहेका छौँ ?’ भन्दै उनले राज्यका निकाय, सञ्चारमाध्यम र सामाजिक सञ्जाल प्रयोगकर्ताले संवेदनशील घटनामा आफ्नो जिम्मेवारीबारे गम्भीर हुनुपर्ने बताए।