काठमाडौं । सत्तारुढ राष्ट्रिय स्वतन्त्र पार्टी (रास्वपा)का सांसद अमरेशकुमार सिंहले सरकारप्रति जनताको विश्वास र भरोसा क्रमशः घट्दै गइरहेको बताएका छन्। प्रतिनिधिसभाको बैठकमा बोल्दै उनले पछिल्लो समय समाजमा अराजकता, अस्थिरता र विभिन्न किसिमका हिंसात्मक घटनाहरू बढ्दै गएको भन्दै सरकारको कार्यशैलीमाथि गम्भीर प्रश्न उठाएका हुन्।

सांसद सिंहले पछिल्ला केही घटनालाई छुट्टाछुट्टै रूपमा मात्र हेर्न नहुने बताए। बारा र सप्तरीमा भएका घटनासहित देशका विभिन्न स्थानमा निरन्तर देखिइरहेका सामाजिक तथा राजनीतिक तनावले राज्यको प्रभावकारितामाथि नै प्रश्न उठाएको उनको भनाइ थियो।

उनले सरकार गठन भएयता विभिन्न क्षेत्रमा असन्तुष्टि र समस्या देखिँदै आएको उल्लेख गरे। कप्तानगन्जको घटनादेखि धार्मिक तथा सामाजिक सद्भावमा देखिएका तनाव, मिटरब्याज पीडित, लघुवित्त पीडित र चिकित्सकसँग सम्बन्धित आन्दोलनसम्मका घटनालाई हेर्दा जनतामा सरकारप्रतिको विश्वास कमजोर हुँदै गएको संकेत देखिएको उनले बताए।

सिंहले प्रतिनिधिसभामा भने, ‘यो हाम्रो समाज कता गइरहेको छ ? बारा र सप्तरीका दुईवटा घटनालाई मात्रै हेरेर हुँदैन। हाम्रो सरकार बनेदेखि कप्तानगन्जको घटना होस्, धार्मिक–सामाजिक सद्भावको विषय होस् या मिटरब्याज, लघुवित्त पीडित र डाक्टरका समस्या हुन्, दिनदिनै भइरहेका घटनाले सरकारको प्रभाव र विश्वास जनतामा घट्दै गएको देखाउँछ।’

उनका अनुसार राज्यका विभिन्न संयन्त्रले समयमै समस्या पहिचान गरेर समाधान गर्न नसक्दा समाजमा असन्तुष्टि बढ्ने अवस्था सिर्जना हुन्छ। कुनै समस्या लामो समयसम्म समाधान नभई थुप्रिँदै जाँदा त्यसले आन्दोलन, विरोध र सामाजिक तनावको रूप लिन सक्ने भन्दै उनले सरकारलाई यसतर्फ गम्भीर हुन आग्रह गरे।

सिंहले समाजमा अराजकता र अस्थिरता बढ्दै जाँदा त्यसको प्रत्यक्ष असर सर्वसाधारण नागरिकको दैनिक जीवनमा पर्ने बताए। हत्या, हिंसा, बलात्कार, विभिन्न प्रकारका आन्दोलन तथा सामाजिक तनावका घटनाले नेपाली जनतालाई निरन्तर दुःख दिइरहेको उनको भनाइ थियो।

उनले सरकारको मुख्य जिम्मेवारी नागरिकलाई सुरक्षित वातावरण प्रदान गर्नु, कानुनको प्रभावकारी कार्यान्वयन गर्नु र जनतामा राज्यप्रतिको भरोसा कायम गर्नु भएको बताए। तर राज्यका विभिन्न तहमा देखिने कमजोरी र समस्या समाधानमा हुने ढिलाइका कारण नागरिकमा निराशा बढ्न सक्ने उनले चेतावनी दिए।

सिंहले कुनै पनि समाजमा राज्यप्रतिको विश्वास कमजोर हुँदै गए त्यसको परिणाम गम्भीर हुन सक्ने बताए। उनका अनुसार नागरिकले आफ्नो समस्या राज्यले समाधान गर्छ भन्ने विश्वास गुमाएपछि मानिसहरू वैकल्पिक बाटो खोज्न थाल्छन् र त्यही अवस्थाले सामाजिक बेथिति तथा अपराधलाई बढावा दिन सक्छ।

उनले भने, ‘जब समाजमा बेथिति हुन्छ, जब विश्वास र भरोसा उठ्छ, त्यो समाजमा अपराध बढ्छ।’ त्यसैले पछिल्ला घटनालाई केवल सुरक्षा वा प्रशासनिक समस्याका रूपमा मात्र नहेरी त्यसको सामाजिक, आर्थिक र राजनीतिक कारणबारे समेत गम्भीर छलफल आवश्यक रहेको उनले बताए।

सांसद सिंहले विभिन्न समूहले पटक-पटक आन्दोलन गर्नुपर्ने अवस्था आउनु पनि राज्यको समस्या समाधान गर्ने क्षमता कमजोर भएको संकेत हुन सक्ने बताए। मिटरब्याज पीडित, लघुवित्त पीडित, चिकित्सक तथा अन्य विभिन्न क्षेत्रका नागरिकले आफ्ना माग लिएर सडकमा आउनुपर्ने अवस्थाको स्थायी समाधान खोज्न सरकार केन्द्रित हुनुपर्ने उनको धारणा थियो।

उनका अनुसार तत्कालका लागि आन्दोलन रोक्ने वा सम्झौता गर्नेभन्दा पनि समस्या उत्पन्न हुने कारण पहिचान गरी दीर्घकालीन समाधान खोजिनुपर्छ। अन्यथा एउटा समस्या समाधान भएलगत्तै अर्को समस्या उत्पन्न हुने र सरकार निरन्तर प्रतिक्रियात्मक भूमिकामा मात्र सीमित हुने अवस्था आउन सक्ने उनले बताए।

सिंहले पछिल्ला घटनालाई लिएर संसद्मा पर्याप्त र गम्भीर बहस आवश्यक रहेको बताए। समाजमा बढ्दै गएको असन्तुष्टि, अपराध र अराजकताको कारणबारे सरकार, राजनीतिक दल र सम्बन्धित निकायले साझा रूपमा समीक्षा गर्नुपर्ने उनको भनाइ थियो।

उनले सरकारलाई नागरिकसँगको संवाद बढाउन, स्थानीय तहसम्म राज्यको उपस्थिति प्रभावकारी बनाउन तथा समस्यामा परेका समुदायको गुनासो समयमै सम्बोधन गर्न सुझाव दिए। जनताको विश्वास पुनः स्थापित गर्न सरकारको कामकारबाही पारदर्शी, जवाफदेही र परिणाममुखी हुनुपर्ने उनको जोड थियो।