काठमाडौं। काठमाडौं उपत्यकाका सडकमा देखिने खाल्डाखुल्डी तत्काल पुर्न सडक डिभिजन कार्यालय काठमाडौंले ‘सडक पोटहोल मर्मत एम्बुलेन्स’ परिचालन गरेको छ।

सडकलाई सुरक्षित र व्यवस्थित बनाउने उद्देश्यले सुरु गरिएको अभियानअन्तर्गत अहिले चक्रपथबाहिरका सडकमा मर्मतलाई प्राथमिकता दिइएको कार्यालयले जनाएको छ।

चक्रपथभित्रका सडकको मर्मत सकेपछि बाहिरी क्षेत्रमा काम अघि बढाइएको हो।

सवारी चाप कम हुने रातको समयसमेत उपयोग गरेर मर्मतलाई तीव्रता दिइएको छ। सोमबार साँझ नारायणगोपाल चोक–बुढानीलकण्ठ सडकखण्डअन्तर्गत गोल्फुटार, हात्तीगौंडालगायत क्षेत्रमा एम्बुलेन्समार्फत सडकका क्षतिग्रस्त भाग मर्मत गरिएको थियो।

खाल्डाखुल्डी देखिनेबित्तिकै प्राविधिक टोलीसहितको ‘सडक एम्बुलेन्स’ सम्बन्धित स्थानमा पुग्ने व्यवस्था गरिएको छ। कार्यालयले यस सेवालाई वर्षभरि ३६५ दिन, चौबीसै घण्टा सञ्चालन गर्ने योजना बनाएको छ।

एम्बुलेन्समा खाल्डो काट्ने, सफा गर्ने, इमल्सन तताउने र छर्कनेलगायत सडक मर्मतका लागि आवश्यक उपकरण जडान गरिएको छ। त्यसका लागि तालिमप्राप्त प्राविधिक टोलीसमेत परिचालन गरिएको छ।

सडक मर्मत आवश्यक पर्ने स्थानको जानकारी संकलन गर्न कार्यालयले ‘रोड मेन्टिनेन्स साइट रेस्क्यु (आरएमएसआर)’ नामक मोबाइल एप पनि सञ्चालनमा ल्याएको छ। एपमार्फत प्राप्त सूचनाका आधारमा मर्मत टोलीलाई सम्बन्धित स्थानमा पठाइने कार्यालयले जनाएको छ।

काठमाडौंमा पाइलट परियोजनाका रूपमा सुरु गरिएको ‘सडक एम्बुलेन्स’ प्रभावकारी भए देशका अन्य सडक डिभिजनमा समेत विस्तार गर्ने योजना रहेको कार्यालयले जनाएको छ।