काठमाडौं। सन् २०२६ को गर्मीयाम युरोपका लागि असामान्य गर्मीको वर्ष बनेको छ। दक्षिणी युरोपमा ४० डिग्री सेल्सियसभन्दा माथिको तापक्रम नयाँ विषय नभए पनि यसपटक मध्य, उत्तरी र पश्चिमी युरोपका तुलनात्मक रूपमा चिसा क्षेत्रमा समेत तापक्रमले ४० डिग्रीको सीमा पार गरेको छ।

युरोपेली ड्राउट अब्जर्भेटरीको अगस्ट १५ सम्मको तथ्याङ्कमा आधारित एएफपीको विश्लेषणअनुसार टर्कीबाहेक युरोपका त्यस्ता क्षेत्रमा करिब एक करोड ८० लाख मानिस बसोबास गर्छन्, जहाँ सन् २००० यता पहिलोपटक ४० डिग्री सेल्सियस तापक्रम पुगेको हो।

यसको ठूलो असर जर्मनीमा देखिएको छ। बर्लिनको दक्षिण तथा पश्चिम र फ्र्याङ्कफर्ट आसपासका क्षेत्रमा करिब ९० लाख मानिसले ४० डिग्रीसम्मको गर्मी सामना गरेका छन्। फ्रान्सका पूर्वी क्षेत्र तथा ब्रिटनीमा पनि करिब ४० लाख मानिस प्रभावित भएका छन्।

स्पेनमा गर्मीको अवधि झन् लामो देखिएको छ। जुनको मध्यदेखि अगस्टको मध्यसम्म लेरिडा, कर्डोबा र ग्रानाडा आसपासका क्षेत्रमा ५५ दिनभन्दा बढी तापक्रम ३५ डिग्री सेल्सियसभन्दा माथि रह्यो।

स्पेनको मौसम निकाय एइएमइटीका अनुसार लेरिडाको मौसम केन्द्रमा लगातार एक महिनाभन्दा बढी समय हरेक दिन ३५ डिग्रीभन्दा माथि तापक्रम मापन भएको थियो। उत्तरतर्फको लेरिडामा यस्तो अवस्था यसअघि देखिएको थिएन।

साइप्रसको राजधानी निकोसियामा पनि ५५ दिनभन्दा बढी समय ३५ डिग्रीभन्दा माथिको तापक्रम कायम रह्यो।

मध्य, पूर्वी र उत्तरी युरोपका कैयौँ देशमा यस वर्ष तापक्रमले पुराना रेकर्डसमेत तोडेको छ। डेनमार्कमा ३७ डिग्री, स्लोभाकियामा ४२.२ डिग्री र जर्मनी, अस्ट्रिया, चेक गणतन्त्र तथा पोल्यान्डका विभिन्न क्षेत्रमा ४० देखि ४२ डिग्रीसम्म तापक्रम पुगेको छ।

इटालीको सार्डिनियास्थित ओरानीमा जुलाई १९ मा ४८.४ डिग्री सेल्सियस तापक्रम मापन भएको थियो। यो सन् २०२१ मा सिसिलीमा रेकर्ड गरिएको युरोपको उच्चतम ४८.८ डिग्री सेल्सियसभन्दा केही कम हो।

युरोपका लागि यस वर्षको गर्मीको अर्को चिन्ताजनक पक्ष रातको तापक्रम हो। दिनभर चर्को गर्मी भएपछि रातमा शरीरले राहत पाउने अपेक्षा गरिए पनि धेरै क्षेत्रमा रातसमेत असामान्य रूपमा तातो रह्यो।

युरोपेली ड्राउट अब्जर्भेटरीका अनुसार करिब एक करोड ८० लाख मानिस बसोबास गर्ने क्षेत्रमा रातको तापक्रम २५ डिग्रीभन्दा तल झरेन।

फ्रान्सको पे दे ला लोयर क्षेत्रमा करिब ५० लाख मानिस तथा पेरिस आसपासका क्षेत्रमा यस्तो अवस्था देखिएको थियो। पोल्यान्डको राजधानी वार्सा आसपासमा समेत रातको तापक्रम असामान्य रूपमा उच्च रह्यो।

इटालीका पश्चिमी क्षेत्र, सिसिली र दक्षिणी एड्रियाटिक तटका केही भागमा दुई महिनाको अवधिमा २० भन्दा बढी रात तापक्रम २५ डिग्रीभन्दा माथि रह्यो। क्रोएसियाको ब्राच टापु आसपासमा पनि असामान्य रूपमा ताता रात देखिए।

विज्ञहरूका अनुसार दिनमा मात्र नभई रातमा समेत तापक्रम उच्च रहँदा शरीरले पुनः सामान्य अवस्थामा फर्कने अवसर पाउँदैन। लामो समयसम्म यस्तो अवस्था कायम रहँदा स्वास्थ्यसँगै ऊर्जा, कृषि र वातावरणमा समेत असर पर्न सक्छ।

सन् २०२६ का तथ्याङ्कले युरोपमा जलवायु परिवर्तनको असर अब केही दिनको अत्यधिक गर्मीमा मात्र सीमित नरहेको देखाएको छ।

गर्मीको अवधि लम्बिनु, नयाँ क्षेत्रमा ४० डिग्री पार हुनु र रातसमेत चिसिन छाड्नुले युरोपको बदलिँदो जलवायुको गम्भीर संकेत गरेको छ।