काठमाडौं । अखिल (क्रान्तिकारी) का केन्द्रीय सचिव शिशिर बस्यालले संगठनको आन्तरिक संरचनालाई पूर्णता नदिई अन्य विद्यार्थी संगठनसँग एकता वा सहकार्य अघि बढाउन नसकिने बताएका छन्।

जेठ २९ गते बसेको अखिल (क्रान्तिकारी) केन्द्रीय समितिको बैठकको म्यान्डेटअनुसार परिपत्र जारी गर्न माग गर्दै आफूले भर्चुअल माध्यमबाट संगठनमा निवेदन दर्ता गराएको जानकारी दिँदै बस्यालले यथाशीघ्र सांगठनिक रिक्तताको समस्या समाधान गर्न नेतृत्वसँग आग्रह गरेका छन्।

बस्यालले अखिल (क्रान्तिकारी) को संगठनात्मक संरचना पूर्ण नहुँदै कुनै अन्य घटकसँगको एकता स्वीकार गर्न नसकिने स्पष्ट पारेका छन्। उनले संगठनभित्रको आन्तरिक कमजोरी समाधान गरेर मात्रै संयुक्त विद्यार्थी आन्दोलनलाई प्रभावकारी बनाउन सकिने धारणा राखेका छन्।

उनका अनुसार पछिल्लो दुई वर्षदेखि अखिल (क्रान्तिकारी) का तीनवटा महत्वपूर्ण प्रदेश कमिटी नेतृत्वविहीन छन्। उपत्यका विशेष प्रदेश, विश्वविद्यालय प्रदेश र मधेश प्रदेश कमिटी लामो समयदेखि पूर्ण रूपमा सञ्चालनमा आउन नसकेको भन्दै उनले यसले संगठनको शक्ति क्षयीकरणमा गम्भीर असर पारेको बताएका छन्।

‘संयुक्त’ भन्नाले सबैलाई एउटै ठाउँमा उभ्याउने वा विभिन्न शक्तिलाई एउटै उद्देश्यमा जोड्ने भन्ने अर्थ लाग्ने भन्दै बस्यालले संयुक्त विद्यार्थी संगठन निर्माणको उद्देश्य शक्ति वृद्धि हुनुपर्ने बताएका छन्। तर आफ्नै संगठनका महत्वपूर्ण संरचना सञ्चालन गर्न नसक्ने अवस्थामा अन्य संगठनसँगको एकताले मात्रै शक्ति वृद्धि नहुने उनको तर्क छ।

उनले संगठनका आफ्ना नेता तथा कार्यकर्तालाई किनारामा पुर्‍याएर अन्य घटकसँग जतिसुकै सहकार्य वा एकता गरे पनि संगठन बलियो बन्न नसक्ने चेतावनी दिएका छन्। आफ्नै संगठन कमजोर हुँदा संयुक्त उद्देश्य बोकेको विद्यार्थी आन्दोलनसमेत कमजोर हुने उनको भनाइ छ।

बस्यालले सबैभन्दा पहिले अखिल (क्रान्तिकारी) लाई संगठनात्मक रूपमा पूर्णता दिनुपर्नेमा जोड दिएका छन्। रिक्त रहेका प्रदेश तथा अन्य संरचनालाई तत्काल पूर्णता दिएर संगठनलाई व्यवस्थित र प्रभावकारी ढंगले परिचालन गर्नुपर्ने उनको माग छ।

उनले अखिल (क्रान्तिकारी) ले पूर्णता नपाउन्जेल ‘संयुक्त विद्यार्थी संगठन’ का कुनै पनि कार्यक्रममा सहभागी नहुनेसमेत घोषणा गरेका छन्। यद्यपि, अखिल (क्रान्तिकारी) को आफ्नै ब्यानरमा तल्लो तहसम्म हुने कार्यक्रममा भने आफू आम कार्यकर्ताको हैसियतमा सहभागी हुने उनले स्पष्ट पारेका छन्।

बस्यालले आफ्नो असहमति व्यक्तिगत स्वार्थ वा पदको आकांक्षाका कारण नभएको दाबी गरेका छन्। संगठनलाई वर्तमान अवस्थामा प्रभावकारी रूपमा अघि बढाउन आन्तरिक संरचना मजबुत बनाउनु आवश्यक रहेको उनको भनाइ छ।

उनले स्थायी पक्षधरता कहिलेकाहीँ दासता जन्माउने खतरा रहेको भन्दै संगठनभित्र देखिएका कमजोरी सुधार्ने प्रयास गर्नुपर्ने बताएका छन्। सुधार सम्भव नभए आफ्नो पक्षधरता परिवर्तन गर्न सकिने तर दासत्व स्वीकार गर्न नसकिने उनको स्पष्ट धारणा छ।

‘सकेसम्म सुधार्ने हो, नसके पक्षधरता बदल्ने हो, दासत्व स्वीकार्ने होइन,’ बस्यालले भनेका छन्।