काठमाडौं । प्रधानमन्त्री बालेन्द्र शाहले संसदमा लगाउँदै आएको कालो चस्मा नछाड्ने भएका छन्। सभामुख डोलप्रसाद अर्यालले संसद बैठकमा कालो चस्मा नलगाउन आग्रह गरे पनि प्रधानमन्त्री शाह बुधबारको प्रतिनिधि सभा बैठकमा कालो चस्मामै उपस्थित हुने भएका हुन्।

प्रधानमन्त्री शाह बुधबार दिउँसो १ बजे प्रतिनिधि सभा बैठकमा सहभागी हुनेछन्। उक्त बैठकमा सांसदहरूले प्रधानमन्त्रीसँग प्रत्यक्ष प्रश्न गर्ने र उनले जवाफ दिने कार्यक्रम छ।

संसद बैठकमा कालो चस्मा लगाएर उपस्थित हुने विषयमा सभामुख अर्यालले यसअघि नै चासो जनाएका थिए। उनले प्रमुख सचेतक तथा सचेतकमार्फत सांसदहरूलाई कालो चस्मा नलगाई बैठकमा उपस्थित हुन आग्रह गरेका थिए। स्वास्थ्यका कारण कालो चस्मा लगाउनुपर्ने भए त्यसको कारण खुलाएर स्वास्थ्य परीक्षणको रिपोर्टसमेत उपलब्ध गराउन सभामुखले भनेका थिए।

तर, सभामुखको आग्रहपछि पनि प्रधानमन्त्री शाहले कालो चस्मा नछाड्ने निर्णय गरेका छन्। बरु उनले कालो चस्मा लगाउनुपर्ने स्वास्थ्यसम्बन्धी कारणसहित संसद सचिवालयलाई पत्र पठाएका छन्। पत्रसँगै उनले स्वास्थ्य परीक्षणको रिपोर्टसमेत उपलब्ध गराएका छन्।

प्रधानमन्त्री शाहले गत साउन २२ गते नेपाली सेनाको छाउनीस्थित सैनिक अस्पतालमा आँखाको परीक्षण गराएका थिए। लेफ्टिनेन्ट कर्णेल डा। सचित ढकालले उनको आँखाको परीक्षण गरेका थिए।

स्वास्थ्य परीक्षणको रिपोर्टअनुसार प्रधानमन्त्री शाहलाई उज्यालोमा हेर्न कठिन हुने समस्या देखिएको छ। त्यस्तै, आँखामा सुख्खापन हुने भएकाले बेलाबेला आइड्रप प्रयोग गर्नुपर्ने चिकित्सकीय सुझाव दिइएको छ। यही कारण आफूले कालो चस्मा लगाउनुपरेको प्रधानमन्त्रीले संसद सचिवालयलाई जानकारी गराएका हुन्।

यसअघि संसदमा प्रधानमन्त्रीसहित केही सांसदहरू कालो चस्मा लगाएर उपस्थित भएपछि त्यसबारे बहससमेत भएको थियो। संसदमा कालो चस्माको प्रयोगलाई लिएर सभामुखले रोक्न खोजे पनि प्रधानमन्त्रीले स्वास्थ्य कारण देखाउँदै त्यसलाई निरन्तरता दिने भएका छन्।

यससँगै बुधबारको प्रतिनिधि सभा बैठकमा प्रधानमन्त्री शाहको कालो चस्मा कायमै रहने भएको छ। सांसदहरूको प्रश्नको जवाफ दिन संसदमा उपस्थित हुँदा प्रधानमन्त्री शाह चस्मा खोलेर होइन, स्वास्थ्य रिपोर्ट देखाउँदै कालो चस्मामै प्रस्तुत हुनेछन्।