काठमाडौं । इंग्ल्यान्डका तीव्र गतिका बलर ब्राइडन कार्स पाकिस्तानविरुद्धको दोस्रो टेस्टबाट बाहिरिएका छन्।

डर्बीमा शनिबार राति मदिरा सेवनपछि अनुशासनविपरीत व्यवहार गरेको आरोपमा प्रहरीले केही समय नियन्त्रणमा लिएपछि इंग्ल्यान्ड क्रिकेट बोर्ड (ईसीबी)ले उनलाई टोलीबाट हटाएको हो।

३१ वर्षीय कार्स डरहमले डर्बीशायरविरुद्ध जित निकालेपछि भएको उत्सवमा सहभागी भएका थिए। त्यसक्रममा डर्बीको एक बारबाहिर प्रहरीले उनलाई नियन्त्रणमा लिएको भिडियो सार्वजनिक भएको थियो।

डर्बीशायर प्रहरीले मदिरा सेवन गरी अव्यवस्थित व्यवहार गरेको आशंकामा ३० वर्ष उमेर समूहका एक व्यक्तिलाई पक्राउ गरी केही समयपछि रिहा गरिएको जनाएको छ। पक्राउ परेका व्यक्ति कार्स नै भएको बुझिएको छ।

घटनाबारे ईसीबीले अनुसन्धान थालेको छ। स्वतन्त्र क्रिकेट नियामक निकायले समेत छानबिन गर्ने भएकाले अनुसन्धान पूरा नहुँदासम्म कार्स दोस्रो टेस्टका लागि उपलब्ध नहुने ईसीबीले जनाएको छ।

उनको स्थानमा ह्याम्पशायरका सोनी बेकरलाई टोलीमा बोलाइएको छ। पाकिस्तानविरुद्धको दुई टेस्टको सिरिजमा इंग्ल्यान्ड १–० ले अघि छ। पहिलो टेस्ट इंग्ल्यान्डले इनिङ्स र १०३ रनले जितेको थियो।

कार्स यसअघि पनि अनुशासनसम्बन्धी कारबाहीमा परिसकेका छन्। सन् २०१७ देखि २०१९ बीच विभिन्न खेलमा ३०३ पटक सट्टेबाजी गरेको पाइएपछि उनलाई २०२४ मा प्रतिबन्ध लगाइएको थियो। यद्यपि, आफू सहभागी भएका खेलमा भने उनले बाजी नलगाएको बताइएको थियो।