काठमाडाैं। प्रधानमन्त्री बालेन्द्र शाहले बुधबार प्रतिनिधिसभामा सांसदहरुले उठाउने प्रश्नको जवाफ दिँदैछन्। गत १७ जेठमा दिएको विवास्पाद अभिव्याक्तिपछि शाह संसदमा बोलेका छैनन्।  यो विषयमा गएको ७० भन्दा बढी दिनदेखि विपक्षी दलहरुले प्रश्न उठाउँदै आएका छन्। 

यही बीचमा मधेस घटना, नागरिक समस्याहरु ग्यास, मल, पासपोर्ट, उपचार लगायतका विषयहरु पनि सांसदहरुले सोध्ने प्रश्नको केन्द्रमा रहनेछन्। 

संसद् सचिवालयका अनुसार प्रधानमन्त्रीसँगको प्रत्यक्ष प्रश्नोत्तर कार्यक्रममा सत्तारुढ राष्ट्रिय स्वतन्त्र पार्टी (रास्वपा) का सांसदहरू समीक्षा बास्कोटा, कृष्णहरि बुढाथोकी र अमरेशकुमार सिंहले प्रश्न राख्ने भएका छन्।

त्यस्तै, प्रमुख प्रतिपक्षी नेपाली कांग्रेसबाट प्रमुख सचेतक बासना थापा र सांसद गीता गुरुङले प्रधानमन्त्रीसँग प्रश्न गर्नेछन्। नेकपा एमालेका प्रमुख सचेतक ऐनबहादुर महर तथा सांसद गणेशसिंह ठगुन्नाले पनि प्रश्न सोध्ने गरी नाम दर्ता गराएका छन्।

नेपाली कम्युनिस्ट पार्टी (नेकपा) का सांसद वर्षमान पुन र प्रमेशकुमार हमालले समेत प्रधानमन्त्रीसँग प्रश्न राख्नेछन्। श्रम संस्कृति पार्टी संसदीय दलका नेता हर्कराज राई र राष्ट्रिय प्रजातन्त्र पार्टी (राप्रपा) की प्रमुख सचेतक खुश्बु ओलीले पनि प्रश्न गर्ने भएका छन्।

प्रधानमन्त्रीसँग प्रश्न गर्न इच्छुक सांसदहरूले आफूले सोध्न चाहेको प्रश्नसहितको विवरण यसअघि नै संसद् सचिवालयमा दर्ता गराइसकेका छन्। निर्धारित प्रक्रियाअनुसार सचिवालयले प्रश्नहरू संकलन गरी प्रत्यक्ष प्रश्नोत्तरका लागि तयारी गरेको हो।

यसअघि भदौ १ गते बसेको प्रतिनिधिसभा बैठकमा सभामुख डोलप्रसाद अर्याल (डीपी) ले प्रधानमन्त्रीसँग प्रत्यक्ष प्रश्नोत्तर कार्यक्रमका लागि समय निर्धारण गरेका थिए। लामो समयदेखि चर्चामा रहेको प्रधानमन्त्री-सांसद प्रत्यक्ष प्रश्नोत्तर कार्यक्रममार्फत सांसदहरूले सरकारका कामकारबाही, नीतिगत निर्णय तथा समसामयिक विषयमा प्रधानमन्त्रीसँग प्रत्यक्ष जवाफ माग्नेछन्।

प्रतिनिधिसभा नियमावलीमा प्रधानमन्त्रीसँग प्रत्यक्ष प्रश्नोत्तरको व्यवस्था

प्रतिनिधिसभा नियमावलीको नियम ५६ मा प्रधानमन्त्रीसँग प्रत्यक्ष प्रश्नोत्तर कार्यक्रम सञ्चालनसम्बन्धी व्यवस्था गरिएको छ। नियमावलीअनुसार प्रधानमन्त्री वा उहाँको कार्यक्षेत्रसँग प्रत्यक्ष रूपमा सम्बन्धित महत्त्वपूर्ण विषयमा प्रश्न गर्न सभामुखले प्रत्येक महिनाको पहिलो हप्ताको कुनै एक दिन बैठकको पहिलो एक घण्टा प्रत्यक्ष प्रश्नोत्तरका लागि छुट्याउनुपर्ने व्यवस्था छ।

सोही व्यवस्थाअनुसार सभामुखले बुधबारका लागि प्रधानमन्त्रीसँग प्रत्यक्ष प्रश्नोत्तर कार्यक्रम तय गरेका हुन्।

त्यस्तै, नियमावलीको नियम ५७ मा प्रत्यक्ष प्रश्नोत्तर कार्यक्रमको प्रत्यक्ष प्रसारणसम्बन्धी व्यवस्था छ। जसअनुसार उक्त कार्यक्रम सरकारी तथा अन्य सञ्चारमाध्यममार्फत प्रत्यक्ष प्रसारण गर्न सकिने प्रावधान छ।

नियम ५८ मा प्रधानमन्त्रीलाई प्रश्न गर्न इच्छुक सांसदले आफ्नो प्रश्नको विषयबारे लिखित जानकारी बैठक सुरु हुनुभन्दा कम्तीमा तीन दिनअघि सभामुखलाई गराउनुपर्ने व्यवस्था गरिएको छ।