सिरहा । सिरहाको मिर्चैया नगरपालिका–५ पुरानो बजारस्थित एक घरमा आगलागी हुँदा एक महिलाको मृत्यु भएको छ ।

प्रहरीका अनुसार आगलागीमा रञ्जितकुमार महतोकी श्रीमती करिब ३० वर्षीया विभा पूर्वेको मृत्यु भएको हो ।

मंगलबार बिहान करिब ११ः३५ बजे महतोको दुईतले पक्की घरमा अचानक आगलागी भएको थियो । आगलागी भएको पाँच मिनेटमै स्थानीयले प्रहरीलाई खबर गरेका थिए ।

सूचना पाएलगत्तै प्रहरी नायब उपरीक्षक पुरुषोत्तमप्रसाद पाण्डेको कमान्डमा प्रहरी टोली घटनास्थल पुगेको थियो । प्रहरीले घरभित्र खोजी गर्दा विभाको शव फेला पारेको हो । आगलागीमा उनको शरीरको अधिकांश भाग जलेको अवस्थामा भेटिएको प्रहरीले जनाएको छ ।

घटनाको अनुसन्धानका लागि जिल्ला प्रहरी कार्यालय सिरहाबाट प्रहरी उपरीक्षक बासुदेव पाठकको कमान्डमा थप टोली घटनास्थल पुगेको थियो । टोलीमा मिर्चैया सरकारी अस्पतालका चिकित्सक तथा विद्युत् प्राविधिकसमेत सहभागी थिए ।

आगलागी कसरी र के कारणले सुरु भयो भन्ने खुलेको छैन । प्रहरीले घटनाको थप अनुसन्धान भइरहेको जनाएको छ ।