काठमाडौं । राष्ट्रिय प्रजातन्त्र पार्टी (राप्रपा)भित्रको आन्तरिक विवाद झन् चर्किँदै गएको छ। बागमती प्रदेश सरकार गठनको विषयबाट सुरु भएको विवाद अहिले पार्टी विभाजनको सम्भावनासम्म पुगेको छ। अध्यक्ष राजेन्द्र लिङ्देनले बागमती प्रदेश सभाका केही सदस्यलाई कारबाहीको प्रक्रिया अघि बढाएपछि पार्टीभित्र कमल थापा नेतृत्वको समूह असन्तुष्ट बनेको छ।

राप्रपाभित्र लामो समयदेखि देखिँदै आएको आन्तरिक असन्तुष्टि पछिल्लो घटनाक्रमसँगै सतहमा आएको हो। बागमती प्रदेशमा सरकार गठनका क्रममा पार्टीको निर्णय, प्रदेश सांसदहरूको भूमिका र नेतृत्वबीचको समन्वयलाई लिएर विवाद बढेको थियो। यही विवादका कारण अध्यक्ष लिङ्देन र कमल थापा पक्षबीचको दूरी थप बढेको नेताहरूको भनाइ छ।

पार्टीभित्रको पछिल्लो अवस्थाबारे भएको कुराकानीमा राप्रपा विभाजनको सम्भावनालाई निकै गम्भीर रूपमा हेरिएको छ। नेपालवान एचडीसँग कुरा गर्दै राप्रपा कार्यसम्पादन समितिका एक सदस्यले केही दिनमै पार्टीभित्र ठूलो राजनीतिक निर्णय आउन सक्ने संकेत गरेका छन्। उनका अनुसार अध्यक्ष राजेन्द्र लिङ्देनले कमल थापा नेतृत्वको राप्रपा नेपालसँगको एकता टुंगिएको घोषणा गर्ने सम्भावना बलियो छ। 

कुराकानीका क्रममा पार्टीभित्रको अवस्थाबारे प्रश्न उठेपछि एक नेताले राप्रपा विभाजनको सम्भावना रहेको बताएका छन्। ती नेताले बागमती प्रदेशका सांसदलाई कारबाही गर्ने विषयमा पनि छलफल भएको बताए। 

राप्रपामा अहिले अध्यक्ष लिङ्देनले प्रदेश सांसदविरुद्ध प्रक्रिया अघि बढाएपछि त्यसको कार्यान्वयन कसरी हुन्छ भन्ने विषयमा अन्योल छ। अध्यक्षले राजीनामा दिनेजस्तो गरेर पत्र पठाएपछि सभामुखलाई अब त्यहाँ प्रदेश सदस्यले नगर्नु विधानविपरीत छ भन्ने अवस्था छ।

राप्रपाभित्रको विवादको अर्को महत्वपूर्ण पक्ष कमल थापा नेतृत्वको तत्कालीन राष्ट्रिय प्रजातन्त्र पार्टी नेपाल र राजेन्द्र लिङ्देन नेतृत्वको राप्रपाबीचको एकीकरणसँग जोडिएको छ। राजनीतिक रूपमा एकता भए पनि कानुनी प्रक्रिया पूर्ण रूपमा टुंगिएको छैन भन्ने विषयलाई कमल थापा पक्षले उठाउँदै आएको बताइन्छ।

कुराकानीमा निर्वाचन आयोगमा समेत दुवै दलको नामसम्बन्धी विषय बाँकी रहेको दाबी गरिएको छ।

यही अवस्थाबीच कमल थापा पक्षका नेताहरू असन्तुष्ट बन्दै गएको र उनीहरूलाई पार्टी अध्यक्ष लिङ्देनले नै कमल थापासँग एकता टुंगिएको घोषणा गर्न सक्ने ती नेताले बताए। उनका अनुसार अहिले पार्टीभित्र कमल थापा लगायत दीपक सिंह, दिनेश श्रेष्ठ, नीलकण्ठ काफ्लेलगायतका नेताहरू असन्तुष्ट छन्।

नेपालवान एचडीसँग ती नेताले भने, ‘कमल थापाका मान्छेहरू दबेको अवस्थामा छन्। दीपक सिंह, दिनेश श्रेष्ठ, नीलकण्ठ काफ्ले लगायतका थुप्रै मान्छे रिसाएका छन्। यस्तो अवस्थामा भोलि-पर्सी नै राजेन्द्र लिङ्देनले कमल थापासँगको एकता भङ्ग भयो भनेर घोषणा गर्न सक्छन्।’

कुराकानीमा राप्रपाभित्रको विभाजनको सम्भावनानिकै बलियो रहेको बताएका छन्।राप्रपाभित्रको पछिल्लो विवादले पार्टीको आगामी राजनीतिक दिशामाथि समेत प्रश्न उठाएको छ। 

तत्कालीन महामन्त्री धवलशमशेर रानाले पार्टी छाडेर छुट्टै दल गठन गरिसकेको अवस्थामा कमल थापा पक्ष पनि अलग भए राप्रपाको संगठनात्मक आधारमा ठूलो असर पर्न सक्ने देखिन्छ। यद्यपि पार्टी विभाजनबारे दुवै पक्षबाट औपचारिक घोषणा भने भइसकेको छैन।