काठमाडौं। रसुवामा बुधबार आएको बाढीले नेपाल विद्युत् प्राधिकरणका विद्युत् गृह तथा प्रसारण संरचनामा ठूलो क्षति पुर्‍याएको छ। बाढीका कारण रसुवा र आसपासका क्षेत्रमा विद्युत् आपूर्ति प्रभावित भएको प्राधिकरणले जनाएको छ।

प्राधिकरणका अनुसार बाढीले रसुवागढी, चिलिमे र त्रिशूली–३ ‘ए’ जलविद्युत् केन्द्रमा क्षति पुर्‍याएको छ। यस्तै, त्रिशूली–३ ‘बी’ हबअन्तर्गतको २२० केभी सबस्टेसन पनि प्रभावित भएको छ।

बाढीका कारण त्रिशूली र देवीघाट जलविद्युत् केन्द्र तथा विभिन्न वितरण संरचनामा समेत क्षति पुगेको प्राधिकरणले जनाएको छ। उत्पादन, प्रसारण र वितरणतर्फका संरचना प्रभावित भएपछि केही क्षेत्रमा विद्युत् आपूर्ति अवरुद्ध भएको छ।

विद्युत् आपूर्ति नियमित गर्न प्राधिकरणका प्राविधिक टोली परिचालन गरिएको छ। आपूर्ति सहज हुन केही समय लाग्न सक्ने भन्दै प्राधिकरणले नियमित आपूर्ति नहुँदासम्म उपभोक्तालाई धैर्य गर्न आग्रह गरेको छ।

बाढीले विद्युत् संरचनामात्र होइन, घर, सडक र पुललगायतका भौतिक पूर्वाधारमा समेत क्षति पुर्‍याएको प्रारम्भिक विवरण छ। क्षतिको विस्तृत विवरण संकलन भइरहेको प्राधिकरणले जनाएको छ।

प्राधिकरणले प्रभावित क्षेत्रमा उद्धार, राहत र पुनःस्थापनाका काम तत्काल प्रभावकारी रूपमा अघि बढाउन सम्बन्धित निकायलाई आग्रह गरेको छ। नदी तथा खोलाको आसपास र अन्य जोखिमयुक्त क्षेत्रमा रहेका सर्वसाधारण तथा कर्मचारीलाई उच्च सतर्कता अपनाउनसमेत भनिएको छ।

यसअघि पनि रसुवामा बाढीका कारण जलविद्युत् आयोजना तथा प्रसारण संरचनामा क्षति पुगेको थियो। पछिल्लो बाढीले पुनः ऊर्जा पूर्वाधारमै असर पारेपछि विद्युत् उत्पादनदेखि प्रसारण र वितरणसम्मको प्रणालीमा थप दबाब परेको छ।