काठमाडौं । रसुवाको भोटेकोशीमा आएको भीषण बाढीपछि प्रधानमन्त्रीले आपत्कालीन बैठक बोलाएका छन्।

राष्ट्रिय विपद् जोखिम न्यूनीकरण तथा व्यवस्थापन परिषद्को बैठकपछि गृहमन्त्री, ऊर्जामन्त्री, स्वास्थ्यमन्त्री तथा सुरक्षा निकायका प्रमुखलगायत प्रधानमन्त्री कार्यालयतर्फ जाँदै छन्।

बाढीबाट रसुवाको टिमुरे, स्याफ्रुबेँसीलगायत क्षेत्रमा ठूलो क्षति पुगेपछि उद्धार, राहत तथा खोजी कार्यलाई तीव्र बनाउने विषयमा बैठकमा छलफल हुने बताइएको छ।

बाढीका कारण तटीय बस्ती, प्रहरी कार्यालय, जलविद्युत् तथा अन्य भौतिक संरचनामा क्षति पुगेको प्रारम्भिक विवरण आएको छ।

प्रभावित क्षेत्रमा उद्धार तथा राहतका लागि राज्यका सबै संयन्त्र परिचालन गर्ने तयारी भइरहेको छ।