काठमाडौं । रसुवामा आएको भीषण बाढीपछि नेपाल प्रहरी र सशस्त्र प्रहरी बलका गरी ४१ जना सुरक्षाकर्मी सम्पर्कविहीन भएका छन्। बाढीको तीव्र बहावका कारण सुरक्षाकर्मी बसेको तथा परिचालन भएको क्षेत्रमा समेत क्षति पुगेपछि उनीहरू सम्पर्कविहीन भएको जनाइएको छ।

प्राप्त विवरणअनुसार नेपाल प्रहरीका ३२ जना र सशस्त्र प्रहरी बलका ९ जना गरी कुल ४१ जना सुरक्षाकर्मी सम्पर्कविहीन भएका हुन्। बाढी प्रभावित क्षेत्रमा खोज तथा उद्धार कार्य जारी रहे पनि सम्पर्कविहीन सुरक्षाकर्मीको अवस्थाबारे तत्काल स्पष्ट जानकारी आउन सकेको छैन।

नेपाल प्रहरीका केन्द्रीय प्रवक्ता तथा प्रहरी नायब महानिरीक्षक (डीआईजी) अबिनारायण काफ्लेका अनुसार अहिलेसम्म ३२ जना नेपाल प्रहरीका सुरक्षाकर्मी सम्पर्कविहीन छन्। बाढीले प्रभावित क्षेत्रमा सञ्चार सम्पर्कमा समेत समस्या उत्पन्न भएकाले सुरक्षाकर्मीको अवस्थाबारे विवरण संकलन गर्न कठिनाइ भइरहेको बताइएको छ।